პოპულარულმა საკალათბურთო პორტალმა, Eurohoops-მა გიორგი შერმადინი ჩემპიონთა ლიგის ათწლეულის სიმბოლურ გუნდში შეიყვანა.
საკალათბურთო ჩემპიონთა ლიგა 2016 წლიდან იმართება და ამ დროის მანძილზე ამ ტურნირში მონაწილეობა არაერთმა გამორჩეულმა მოთამაშემ მიიღო.
„გიორგი შერმადინი ჩემპიონთა ლიგის ყველა დროის საუკეთესო ბომბარდირია. მარსელინიო უერტასთან ერთად, მან ტურნირის ერთ-ერთი ყველაზე ეფექტური დუეტი ჩამოაყალიბა. ქართველი ცენტრი ფარქვეშ მეტოქეებთან მაღალი დონის თამაშით გამოირჩევა.
შერმადინი მნიშვნელოვანი ფიგურა იყო „ტენერიფეს“ იმ გუნდში, რომელმაც 2022 წელს ჩემპიონთა ლიგა მოიგო. მისი შთამბეჭდავი სტატისტიკა და წლების განმავლობაში შენარჩუნებული მაღალი სათამაშო დონე საფუძველი იყო იმისთვის, რომ ათწლეულის საუკეთესო ხუთეულში შეგვეყვანა“, – წერს გამოცემა.
შერმადინთან ერთად ხუთეულში არიან – მარსელინიო უერტასი, კენდრიკ პერი, ბონზი კოლსონი და ვოიტეხ ჰრუბანი.