საქართველოს კულტურის მინისტრი, ვიცე-პრემიერი თეა წულუკიანი უკრაინის ვიცე-პრემიერ ირინა ვერეშჩუკს მიმართავს და აცხადებს, რომ საქართველოს საზღვრები კონტროლდება და “დანარჩენი ყველაფერი არის ბინძური ტყუილი”.
ვერეშჩუკმა უკრაინის დაზვერვის მიერ გავრცელებულ ინფორმაციაზე, რომლის მიხედვითაც, საქართველოს პოლიტიკური ხელმძღვანელობა რუსეთთან შეთანხმებულია საკუთარი ტერიტორიის გავლით სანქცირებული პროდუქტების კონტრაბანდის სახით შეტანაზე, ქართველ ხალხს მოუწოდა, “გააჩერეთ თქვენი ხელისუფლება და აუხსენით, რომ ამისგან არაფერი კარგი არ გამოვა”.
კულტურის მინისტრი თეა წულუკიანი უკრაინის თავდაცვის სამინისტროს დაზვერვის სამსახურის განცხადებას „გაუგონარ დეზინფორმაციას“ უწოდებს.
მისივე თქმით, საქართველოს ბრალი ვერ იქნება, თუ უკრაინა, საქართველოდან გაქცეული კრიმინალების ნაკრძალად გადაიქცა.
„გუშინ ვნახეთ გაუგონარი დეზინფორმაცია, თითქოს რუსეთის ფედერაცია მართავს, თუ აწყობს არხებს იმისთვის, რომ საქართველოს ტერიტორია გამოიყენოს გარკვეული ტიპის კონტრაბანდისთვის, რაც კიდევ უფრო მნიშვნელოვანია ჩემთვის, ჩვენ ვნახეთ უკრაინის ვიცე-პრემიერის, ირინა ვერეშჩუკის ძალიან ემოციური, ტკივილით დატვირთული ვიდეომიმართვა ქართველი ხალხისადმი, რომელშიც ის ეკითხება ქართველ ხალხს, რა დაგიშავეთ ასეთი, რომ ასეთი მთავრობა გყავთო?! მოკლედ ეს იყო რეზიუმე იმ ძალიან ძნელად მოსასმენი, ბევრი წუხილითა და გაუსაძლისი ტკივილით დატვირთული ვიდეომიმართვისა.
ამ მიმართვისას ქალბატონმა ვიცე-პრემიერმა განაცხადა, რომ საუბრობდა როგორც თავისი ქვეყნის მოქალაქე და მისივე სახელმწიფოს ვიცე პრემიერ-მინისტრი. გამოდის, რომ მეც მიწევს ამაზე საუბარი როგორც ჩემი ქვეყნის მოქალაქეს და ჩემი ქვეყნის მთავრობის ვიცე-პრემიერს. მინდა, მათ კიდევ ერთხელ მივმართო, ქალბატონ ვერეშჩუკს და ასევე ჩვენთვის ძალზე ძვირფას უკრაინელ ხალხს. კიდევ ერთხელ გავიზიარო ჩემი მთავრობის, მთელი ჩვენი ხალხის სახელით ის დიდი ტკივილი, ვინაიდან საქმე გვაქვს ენით აღუწერელ სისასტიკეებთან.
მინდა, ქალბატონ ვერეშჩუკს ვუთხრა. ძვირფასო კოლეგავ, მინდა, გჯეროდეთ და გარწმუნებთ, საქართველოს საზღვრები კონტროლდება. ამის შესახებ ოფიციალური განცხადებაც გაავრცელა საქართველოს ფინანსთა სამინისტრომ და ეს საზღვრები კონტროლდება სწორედ იმისთვის, რომ ნებისმიერი სანქცირებული, იქნება ეს სამხედრო, ორმაგი დანიშნულების მასალა, თუ საქონელი, არ ასცდეს მკაცრ საბაჟო მონიტორინგს ჩვენს საზღვრებზე. ეს არის რეალობა, დანარჩენი ყველაფერი არის ბინძური ტყუილი“, – განაცხადა წულუკიანმა.
კულტურის მინისტრის ამ განცხადებას მუსიკოსი მაია დარსმელიძე სოციალურ ქსელში ეხმაურება:
“სამარცხვინოც აღარ ჰქვია ამ მხოლოდ საკუთარ ერთუჯრედიან მრევლზე კონცენტრირებულ პოპულისტს…
დადასტურდეს ინფო და 5 წუთში დასრულდებით, თქვე ანტიუკრაინული და ანტიდასავლური მესიჯების ვითომ ტექნიკურად მთესავო რუსის მონებო”, – წერს დარსმელიძე “ფეისბუქი”- ს პირად გვერდზე.
2,614 ნახვა
