ნიკო კვარაცხელიას მკვლელობის საქმე – წყნეთის პოლიციის ყოფილი უფროსი, დიმიტრი ქვაჭრელიშვილი რუსტავის ციხეში გამოიკითხება.
დეტალებს პოლკოვნის ადვოკატი, თორნიკე მიგინეიშვილი სოციალურ ქსელში საუბრობს.
უფლებადამცველი ამბობს, რომ ქვაჭრელიშვილმა გამოძიებას მიაწოდა ინფორმაცია იმ ლოკაციების შესახებ, სადაც მკვლელობაში მსჯავრდებულები იმყოფებოდნენ. ასევე სახელები და გვარები ყოფილი და ამჟამინდელი მაღალი თანამდებობის პირების, რომლებიც ასევე იმყოფებოდნენ წყნეთის პოლიციაში საათების განმავლობაში.
“დასრულდა რამდენიმე საათიანი გამოკითხვა.
ნიკო კვარაცხელიას მკვლელობის საქმის ერთ-ერთმა გამომძიებელმა გამოკითხა წყნეთის პოლიციის ყოფილი უფროსი.
უკვე გამოძიებას აქვს ინფორმაცია:
მკვლელების მიერ მოყოლილი სრული ისტორიის შესახებ.
ლოკაციები, სადაც მკვლელობაში მსჯავრდებულები იმყოფებოდნენ.
ტერიტორია, სადაც მკვლელობა იგეგმებოდა.
სახელები და გვარები ყოფილი და ამჟამინდელი მაღალი თანამდებობის პირების, რომლებიც ასევე იმყოფებოდნენ წყნეთის პოლიციაში საათების განმავლობაში.
საუბრების შინაარსი, რომელსაც ისმენდა დიმიტრი ქვაჭრელიშვილი მაღალი თანამდებობის პირებისგან.
დამატებით ფაქტები, რომლებიც მნიშვნელოვანი იქნება შემდგომი საგამოძიებო მოქმედებებისთვის.
დიმიტრი ქვაჭრელიშვილმა ასევე დაწერა წერილი, რომელსაც გიზიარებთ უცვლელად:
“მადლობა ყველას!
ვგრძნობ თქვენს თანადგომასა და სიმართლის მხარეს ერთად ყოფნას.
კიდევ ერთხელ, საჯაროდ, კვარაცხელიების ოჯახს ვუდასტურებ ჩემს სრულ მხარდაჭერას სიმართლის პოვნის გზაზე.
ყველამ უნდა ვიპოვოთ სამართალი. ადამიანებმა, რომლებიც წლების მანძილზე დაგვაზიანა კონკრეტულ პირთა ბოროტებამ და გავლენებმა.
ვარ მხნედ, ბოლომდე ბრძოლის განწყობაზე და დღეს ვცდილობ ჩემი სიმართლე სააპელაციო სასამართლოს დავუმტკიცო.
მესმის, რომ დღეს იმ ადამიანების სახელებისა და გვარების ხსენება, რომლებიც ჯერ კიდევ არიან მაღალ თანამდებობებზე, არ არის უსაფრთხო, მაგრამ დღეს იმედი მაქვს ხალხის მხარდაჭერის და ობიექტური გამოძიების, რომელიც დაიცავს ყველა ირგვლივ მყოფი ადამიანის სიცოცხლესა და ჯანმრთელობას.
მე ვსაუბრობ ღიად გამოძიებასთან, არაფერი მაქვს დასამალი და ვითხოვ – სწრაფ მართლმსაჯულებას, სამართლიანობასა და უსაფრთხოებას.”
დიმიტრი ქვაჭრელიშვილი
20.02.2026 წ.
რუსთავის მე-12 პენიტენციური დაწესებულება” – დიმიტრი ჭვაჭრელიშვილი.