არასამთავრობო ორგანიზაცია საფარის ცნობით, ისინი მუშაობენ ადამიანებთან, რომლებიც გახდნენ ძალადობის მსხვერპლი თბილისის საქალაქო სასამართლოში მანდატურების მხრიდან. 11 დაზარალებულიდან 8 ქალია.
ორგანიზაციის ხელმძღვანელმა, ბაია პატარაიამ აღნიშნა, რომ მიუხედავად არაერთი მტკიცებულების არსებობისა, ბრალი წაყენებული არ არის და არც დაზარალებულის სტატუსი მიუღია ვინმეს.
“ჩვენი საზოგადოებისთვის კარგად არის ცნობილი და არაერთხელ ასახულა პირდაპირ ეთერში თუ ვიდეოში, როგორ ძალადობენ მანდატურები ადამიანებზე. საფარი მუშაობს 11 დაზარალებულთან, საიდანაც 8 ქალია. ყველა მათგანი გახდა ძალადობის მსხვეპლი მანდატურების უფროსის, დავით მატიაშვილისგან ან მისი თანამშრომლების მხრიდან. ეს ძალადობა სისტემური ხასიათისაა. მიუხედავად იმისა, რომ არაერთი მტკიცებულება არსებობს საქმეში, ბრალი წაყენებული არ არის და დაზარალებულის სტატუსი არ მიუღია არცერთ ადამიანს. ამასობაში, გრძელდება გამოძიება, დაკითხულია ყველა მოწმე, ყველა დაზარალებული, ამოღებულია ფოტო/ვიდეო მასალა, სადაც ცხადად ჩანს დანაშაული, თუმცა მიუხედავად ამისა, არ ხდება ბრალის წაყენება.” – თქვეს ბრიფინგზე.
საფარი მოითხოვს მანდატურების იდენტიფიცირებას, ბრალის წარდგენას და საქმეში სახალხო დამცველის ჩართვას.
“მთავარი მოთხოვნაც სწორედ არის ის, რომ ბრალი წაუყენონ, დაიდენტიფიცირდეს ყველა პირი, თავად დავით მატიაშვილი, ცხადია, და სხვა მისი თანამშრომლები, რომლებიც სხვადასხვა დროს ძალადობდნენ სხვადასხვა ადამიანზე. ჩვენი ინფორმაციით, გაცილებით მეტია დაზარალებულთა რიცხვი, ვიდრე 11, უბრალოდ 11-ს იცავს საფარი. სხვადასხვა ტიპის დაზიანებებზე გვაქვს საუბარი, ზოგიერთ შემთხვევაში სამედიცინო დოკუმენტაციაც არსებობს ამ დაზიანებების შესახებ და, რაც მთავარია, ეს არის სამსახურებრივი უფლებამოსილების დროს ჩადენილი დანაშაული და საჭიროა ძალიან სწრაფი რეაგირება პროკურატურის მხრიდან. ჩვენ ასევე ვთხოვთ სახალხო დამცველს, შეისწავლოს ეს საქმე, ჩაერთოს, თვალყური ადევნოს გამოძიებას და მისი უფლებამოსილების ფარგლებში იმოქმედოს.” – განაცხადა ბაია პატარაიამ.