საქართველო რეგიონში უალტერნატივო სატრანზიტო ფუნქციას კარგავს.
ამის დასტურია აზერბაიჯანის პრეზიდენტის დავოსის ფორუმზე გაკეთებული განცხადება, რომლის მიხედვითაც საქართველოს დერეფნით გამავალი ტვირთები, სომხეთის დერეფანზე გადაინაცვლებს. ამ რეალობას ყველა ელოდა. რეგიონში დამყარებული მშვიდობის კვალდაკვალ სატრანზიტო კონკურენცია იზრდება, ახალი სავაჭრო შეთანხმებები იდება, ამ დროს კი სად არის საქართველო?
ტვირთების პოტენციური დანაკარგი, რომელზეც სპეციალისტები მიუთითებენ, ჩვენი ქვეყნისთვის საკმაოდ დიდია. ვიდრე სომხეთი და აზერბაიჯანი ერთმანეთთან დაპირისპირებულები იყვნენ, საქართველო აზერბაიჯანიდან ტვირთების ერთადერთ გამტარი ქვეყანა იყო, ახლა მოცემულობა შეიცვალა. ვაშინგტონში დადებული დიდი ზავის შემდეგ ჩვენი მეზობელი 2 ქვეყანა ერთმანეთთან დაკავშირებადობას ყველა მიმართულებით აღრმავებს, საქართველო აღარც სომხეთ-აზერბაიჯანს შორის ტვირთების გამტარად მოიაზრება.
ყველაფერთან ერთად სომხეთი აზერბაიჯანის გავლით რუსეთში ტვირთების ტრანზიტს ითხოვს, საქართველო ფუნქციას ამ მიმართულებითაც კარგავს. რეგიონში ამერიკული ინტერესები ძლიერდება, ტრამპის გზაზე მუშაობა აქტიურად მიმდინარეობს, ამ ფონზე კი საქართველო ახალ გეოპოლიტიკურ გადალაგებებში და დასავლეთთან ეკონომიკურ შეთანხმებებში არ ფიგურირებს.