“ჩემ ოჯახს მოუწყვეს ტერორი” – ამის შესახებ სინდისის პატიმრის, ვეფხია კასრაძის ცოლმა ელენე კროტენკო-კასრაძემ დიანა ტრაპაიძის ”პოლიტიკური ამბების” ეთერში ისაუბრა.
მან გაიხსენა, როგორ ცემა სასამართლოს მანდატურმა დერეფანში და როგორ დაურეკა უფროსმა სამსახურიდან და უთხრა, რომ თუ სოხუმის უნივერსიტეტში მუშაობა უნდოდა, აზრი არ უნდა გამოეხატა.
მისი თქმით, ის “ქართული ოცნების” ლეგიტიმაციას არ აღიარებს, სანამ თავის ქვეყანაში ადამიანად არ იგრძნობს თავს.
“როგორც ჩვეულებრივმა მოქალაქემ მინდა ვთქვა, რომ ხანდახან მე საერთოდ ადამიანად ვერ ვგრძნობ თავს… მე სანამ არ ვიგრძნობ თავს ადამიანად სამართლიან ქვეყანაში, მე საერთოდ არ ვაღიარებ ამ მთავრობას.
მე მცემეს, ჩემმა მეუღლემ ეს არ იცის, მე მცემა მანდატურმა სასამართლოს დერეფანში. მე დამირეკა უფროსმა, ენის ცენტრის დირექტორმა სამსახურში და მითხრა, თქვენ გამოხატავთ აზრს და თუ გნებავთ სოხუმის უნივერსიტეტში მუშაობა აზრს არ უნდა გამოხატავდეთ.
ჩხრეკაზე მოვიდნენ ჩემ ოჯახში, წამოწვა უფროსი ვინც იყო, სახელი გვარი არ ვიცი, წამოწოლილი მიქნევდა თითებს, რომ წამოწოლილი უნდა იყო და პრობლემები არ გექნება.
ჩემ ოჯახს მოუწყვეს ტერორი, რამდენი ადამიანი დამსდევდა ვერ დავთვალე. როდესაც დააპატიმრეს ჩემი მეუღლე, მეორე დღეს მინიმუმ 8 კაცი დავთვალე, ბავშვი მიმყავდა სკოლაში, სკოლასთან, კორპუსთან… ეს ისტორია 3 წლის წინ დაიწყო, ეს ძველი ამბავია, როდესაც ტერორი მოუწყეს ჩემ ქალიშვილს, 13 წლის არის, ბავშვს ჰქონდა ფობია და საერთოდ ტელეფონის კარტა ამოვუღე, დედიკო მე ვუთხარი, არ შეგეშინდეს კარტა არ გექნება, არავინ არ დაგირეკავს. არ მინდა დეტალებში შესვლა, ვინმემ არ იფიქროს რომ შოუს ვაწყობ.
სანამ ადამიანად მე არ ვიგრძნობ თავს ჩემს ქვეყანაში, სანამ უსაფრთხოდ არ ვიგრძნობ თავს, მე საერთოდ არ ვაღიარებ ამ მთავრობას, არ მაინტერესებს მაგათი აზრები. კეთილი ინებონ ვინც იქნება, უზრუნველყონ ადამიანური არსებობა. არც პროკურორი არ არის ჩემთვის პროკურორი, რადგან ჩვენ ვიჯექით სასამართლო დარბაზში, ძალიან რთული იყო, როდესაც ვიჯექი და… “პირადმა ინფორმატორმა მომიტანა ინფორმაცია იმის შესახებ, რომ ვიღაცა რაღაცას აწყობდა”, სირცხვილია, რაღაცა დაარქვით მაინც, პირადი ინფორმატორი კი არა, რაღაც სტატუსი მიანიჭეთ.
არ ვაღიარებ არავის, არც კობახიძეს, არც პაპუაშვილს, არც პრეზიდენტს, მე არ მაინტერესებს არავინ, მე მინდა სამართლიანი ქვეყანა. მე ამ წუთში სახელმწიფო არ მაქვს, სადღაც ბედუინებში ვარ, სად ვცხოვრობ არ ვიცი, ყველგან ყველა ნაბიჯზე უსამართლობაა,” – განაცხადა ელენე კროტენკო-კასრაძემ.