ირანში გამართული საპროტესტო აქციების დროს დაღუპულთა ოჯახებმა BBC-ს განუცხადეს, რომ ხელისუფლება მათი ახლობლების ცხედრების დასაკრძალად დიდი თანხების გადახდას ითხოვს. რამდენიმე წყარომ BBC Persian-ს განუცხადა, რომ ცხედრები მორგებსა და საავადმყოფოებშია დატოვებული და უსაფრთხოების ძალები მათ არ გადასცემენ, თუ მათი ნათესავები ფულს არ გადაიხდიან. გამოცემა წერს, რომ ქვეყნის მასშტაბით ორ კვირაზე მეტი ხნის განმავლობაში მიმდინარე საპროტესტო აქციების დროს სულ მცირე 2 435 ადამიანი დაიღუპა.
რაშტის ჩრდილოეთით მდებარე ქალაქიდან ერთმა ოჯახმა BBC-ს განუცხადა, რომ უსაფრთხოების ძალებმა მათი საყვარელი ადამიანის ცხედრის გადასაცემად 700 მილიონი თუმანი (5000 აშშ დოლარი) მოითხოვეს. ოჯახის წევრების თქმით, ცხედარი პურსინას საავადმყოფოს მორგში იყო, სულ მცირე 70 სხვა დაღუპული მომიტინგის ცხედართან ერთად.
გამოცემა კიდევ ერთ ასეთ შემთხვევას აღწერს. კერძოდ, თეირანში ქურთი მშენებლის ოჯახს უთხრეს, რომ ცხედრის მისაღებად მილიარდი თუმანი (7000 აშშ დოლარი; 5200 ფუნტი) უნდა გადაეხადათ. ოჯახმა BBC-ს განუცხადა, რომ მათ არ შეეძლოთ საფასურის გადახდა და იძულებული გახდნენ შვილის ცხედრის გარეშე წასულიყვნენ. ირანში მშენებელი მუშა, როგორც წესი, თვეში 100 დოლარზე ნაკლებს გამოიმუშავებს.
ზოგიერთ შემთხვევაში, საავადმყოფოს პერსონალი დაღუპულთა ნათესავებს ურეკავს, რათა წინასწარ აცნობოს, რომ მივიდნენ და ცხედრები გადაასვენონ, სანამ უსაფრთხოების ძალების თანამშრომლები თანხას გამოსძალავენ.