კახეთში, სოფელ შილდაში 48 წლის მამაკაცი მოკლეს. დანით შეიარაღებული თავდამსხმელი მისივე კარის მეზობელი აღმოჩნდა. არსებული ინფორმაციით, 51 წლის ლევან ჩიტაშვილი ნოდარ ასაბაშვილს სახლში შეუვარდა, მრავლობითი სასიკვდილო ჭრილობები მიაყენა და შემთხვევის ადგილიდან მიიმალა.
მკვლელობის დროს 48 წლის ნოდარ ასაბაშვილი სახლში მარტო იმყოფებოდა. მძიმედ დაჭრილმა მამაკაცმა სახლიდან გამოსვლა და მეზობლებისთვის დახმარების თხოვნა მოახერხა – ის ამბობდა, რომ სისხლისგან იცლებოდა, თუმცა მიღებული დაზიანებები სასიკვდილო აღმოჩნდა.
როგორც ადგილობრივები ჰყვებიან, ტრაგიკულ შემთხვევას წინ უსწრებდა მეზობლებს შორის კონფლიქტი, რომელიც ახალი წლის ღამეს დაიწყო და გუშინ მკვლელობით დასრულდა. მათი თქმით, დაპირისპირების მიზეზი ეჭვიანობა გახდა.
შილდაში ამბობენ, რომ ასაბაშვილი და ჩიტაშვილი ერთმანეთს პირველად ახალი წლის პირველ დღეს დაუპირისპირდნენ, როცა ჩიტაშვილმა ასაბაშვილი მის სახლში მარტო მყოფ მეუღლესთან ერთად აღმოაჩინა. კარის მეზობელმა 1 იანვარს 48 წლის კაცი ისე სცემა, რომ ასაბაშვილს სამედიცინო ჩარევა დასჭირდა.
მომხდარზე დაწყებულია გამოძიება. სამართალდამცველები ეძებენ თავდამსხმელს, რომელიც შემთხვევის შემდეგ მიიმალა.