იუმორისტი, ტელეწამყვანი, მსახიობი ნიკა ქავთარაძე სოციალურ ქსელში პოსტს აქვეყნებს, სადაც წერს, რომ დრო დადგა, საკუთარ ჯანმრთელობაზე ფიქრს კონკრეტული დრო დაუთმოს.
როგორც ქავთარაძე აღნიშნავს, მომავალი ბუნდოვანია, რა და როგორ განვითარდება არ იცის, თუმცა, დარწმუნებულია, რომ ყველაფერი უკეთესობისკენ შეიცვლება.
ამასთან, ის საზოგადოებას ურჩევს, უსამართლობას არასდროს შეეგუონ.
“ბოლო ერთი თვე ძალიან ბევრ რამეზე მომიწია ფიქრი, საქმეს და კარიერას ვგულისხმობ.
ასაკი თავისას შვრება და ყველაფერზე უფრო ვღელავ. რადგან ახლა ბევრად ვღელავ ზოგადად მომავალზე.
ადრე, ადრეულ ახალგაზრდობაში, მეტი რისკის უფლებას ვაძლევდი ჩემს თავს.
ახლა აღარ შემიძლია. ფიზიკურად მანგრევს მომავლის ბუნდოვანება. იმდენად მძაფრად ვღელავ, რომ ჯანმრთელობაზე დაიწყო ასახვა. ამიტომ, ახლა ვაპირებ, ერთი კვირა საკუთარ ჯანმრთელობაზე ზრუნვას მივახმარო. ამ კვირაში, სიმშვიდეც მოვა ალბათ და საქმის მომავალსაც ბევრად მშვიდად განვსაზღვრავ.
ვეცდები ყველას და ყველაფერს ზუსტი შეფასება გავუკეთო და სახელი დავარქვა.
აღარ მინდა ილუზიაში და თავის მოტყუებაში გავაგრძელო ყოფნა.
2022 წელია, წელს 44 წლის ვხდები და ჯერ კიდევ სრულიად ბუნდოვანია რა იქნება, თუნდაც გაისად ამ დროს. ხოდა, ცოდო ვარ. მიყვარს ჩემი თავი და დიდხანს მინდა ბედნიერი იყოს…
თქვენც ეცადეთ, იცოდეთ თქვენი თავის ფასი და არასდროს შეეგუოთ უსამართლობას. პირველივე ასეთ მომენტში იყვირეთ, ხმამაღლა თქვით, რომ ასეთ მოქცევას არ იმსახურებთ. და თუ არ გატყდებით, ნელ-ნელა ადამიანები პატივს სცემენ თქვენს პრინციპებს და ვერ გაგიბედავენ იმას, რაც მე ხშირად გავაბედინე გარემოს.
ჩვენ არ გაგვიმართლა, ამ ქვეყანაში ვცხოვრებთ – აქ რთულია უარის თქმა შემოსავალზე, სამსახურზე, ფულზე. სწორედ ესაა ხოლმე მიზეზი, რომ თვალს ვხუჭავთ უსამართლობაზე.
ამას ზოგი ადრე ხვდება, ზოგი გვიან, ზოგს სულაც ფეხებზე ჰკიდია. მაგრამ ეს მართლა მთავარია – საკუთარი თავის დაცვა.
ყველაფერი კარგად იქნება თუ არა არ ვიცი, მაგრამ უკეთესად რომ იქნება – დარწმუნებული ვარ. უბრალოდ, ახლა თავში ძალიან, ძალიან ბევრი მძაფრი აზრია, რომლებზეც უნდა ვიფიქრო და ისე გავაკეთო საყვარელი საქმე. შეცდომების და არასაჭირო დათმობების გარეშე. ამისთვის მჭირდება ერთი კვირა და შეიძლება ინტენსიურ კონტაქტზე ვერ ვიყო.
მიყვარხართ და მინდა ერთმანეთის ბედნიერებით ვიყოთ განებივრებულები”, – წერს ქავთარაძე “ფეისბუქი”-ს პირად გვერდზე.