საქართველოს ექს-პრეზიდენტმა მიხეილ სააკაშვილმა დღევანდელ სასამართლო პროცესზე სიტყვით გამოსვლისასგორის ჰოსპიტალთან მყოფი მიუსაფარი ძაღლები გაიხსენა და თქვა, რომ ისინი სწორედ, მაშინ იწყებდნენ ყეფას, როდესაც მასთან შეხვედრიდან გამოსული პირები განცხადებას აკეთებდნენ.
„მე არ ვიცი რამ, გამახსენა, რატომღაც გამახსენდა და არავის არ ვგულისხმობ, გორის ჰოსპიტალთან იყო რამდენიმე უპატრონო ძაღლი და რამდენი გავიდოდა ჩემგან დეპუტატი, ადვოკატი ან ვიღაცა და აკეთებდა განცხადებებს, ერთი ძაღლი იყო, ძალიან საყვარელი ცუგა, ყოველთვის შედიოდა კადრში. ისინი იწყებდნენ განცხადებებს და ეს იწყებდა ყეფას. ეს იყო მისი ცხოვრებისეული ფუნქცია, რომ არ მიეცა საშუალება და მე რომ გადავძახე, ახალი წელი, რომ მომილოცეს, იქაც იდგა და მახშობდა მე.
ნუ, ყველას სხვადასხვა ფუნქცია აქვს ცხოვრებაში და არავინ არ მინდა თავის თავზე მიიღოს, ვინ არის ეს ცუგა კონკრეტულად. იმიტომ, რომ ის სიმპათიური ცუგა იყო. არსებობენ ცუდი ქუჩის ძაღლები“, – გაიხსენა სააკაშვილმა.
საქართველოს სახელმწიფო საზღვრის უკანონო კვეთის საქმეზე ბრალდებული ყოფილი პრეზიდენტის, მიხეილ სააკაშვილის საქმის არსებითი სხდომა გაიმართა, რომელსაც თავად ბრალდებულიც დაესწრო და სიტყვით გამოვიდა.
შეგახსენებთ, რომ მიხეილ სააკაშვილის მიერ საზღვრის უკანონო კვეთის ფაქტთან დაკავშირებით გამოძიება პირველ ოქტომბერს დაიწყო. აღნიშნული საქმის ფარგლებში ბრალდება კიდევ 4 პირს – ელგუჯა ცომაიას, ზურაბ და შალვა წოწორიებსა და გიორგი ნარიმანიძეს აქვთ წაყენებული და ის ცალკე წარმოებად მიმდინარეობს.
აღნიშნული პირები ბრალს აღიარებენ.
https://mix.metronome.ge/25283-2/