“ემიგრანტებისთვის ხმის უფლების წართმევა არის კონსტიტუციური უფლების ჩამორთმევა” – ამის შესახებ “ლელო – ძლიერი საქართველოს” ერთ-ერთი ლიდერი, მამუკა ხაზარაძე სოციალურ ქსელში წერს და ივანიშვილის გუნდის ახალ გადაწყვეტილებაზე საუბრობს, რომლის თანახმად, ემიგრანტებს საპარლამენტო არჩევნებში მონაწილეობა უცხოეთიდან აღარ შეეძლებათ.
მამუკა ხაზარაძის განცხადებით, ივანიშვილმა დღეს ამ ნაბიჯით აღიარა, რომ “ქართულ ოცნებას” ემიგრაციის ეშინია.
“ქართული ოცნების” მიერ ემიგრანტებისთვის ხმის უფლების წართმევა არის მათთვის კონსტიტუციური უფლების ჩამორთმევა.
ასე ნაბიჯ-ნაბიჯ გვართმევს ყველაფერს ძალაუფლებას ჩაბღაუჭებული ერთი ადამიანი – ყველაფერს, რაც ძვირფასია, რაც ჩვენ გვეკუთვნის და ჩვენი მოქალაქეების ფუნდამენტური უფლებაა!
ასე გაგრძელდება მანამ, სანამ არ გვექნება ადეკვატური პასუხი „ქართული ოცნების“ ანტისახელმწიფოებრივ ნაბიჯებზე.
ივანიშვილმა დღეს ამ ნაბიჯით აღიარა, რომ ქართული ემიგრაციის ეშინია! ემიგრაციაში მყოფ ქართველებში არის უდიდესი ძალა.
თქვენი ბრძოლა ჩანს და ივანიშვილს თქვენი ეშინია – ეშინია არჩევნებში თქვენი მონაწილეობის.
მადლობა იმისთვის, რასაც აკეთებთ და დარწმუნებული ვარ, რომ ამ ბრძოლაში ყველა ერთად ვართ – ემიგრანტიც და საქართველოში მცხოვრებიც. ბრძოლა იქნება ბოლომდე – ყველა სამართლებრივი გზით!” – წერს მამუკა ხაზარაძე.