კოალიცია “ცვლილებებისთვის“ ლიდერი, ზურაბ ჯაფარიძე ციხიდან წერილს აქვეყნებს და პროკურატურას მიმართავს.
როგორც ჯაფარიძე წერს, “რუსთავის მე-12 პენიტენციური დაწესებულების შეხვედრების ერთ-ერთ ოთახში, შეხვედრა ჰქონდა ევროსაბჭოს საპარლამენტო ასამბლეის რაპორტერებთან და მათ დეტალურად მოუყვა, რომელ საკანში რა ხდება.“
საქართველოს პროკურატურა / The Prosecution Service of Georgia. დანაშაულის შესახებ მინდა შეგატყობინოთ.
გუშინ, 12 ნოემბერს, დილის საათებში (ზუსტი დრო არ მახსოვს, დავიბენი) ქ.რუსთავის მე-12 პენიტენციური დაწესებულების შეხვედრების ერთ-ერთ ოთახში, შეხვედრა მქონდა ევროსაბჭოს საპარლამენტო ასამბლეის რაპორტერებთან.
ზუსტად იმ ხალხთან, ვისაც სტრასბურგში ვხვდებოდი ხოლმე, ზუსტად იმ ხალხთან, ვისაც თქვენ დიფ სტეიტის აგენტებად მოიხსენიებთ და ზუსტად იმ ხალხთან, ვისთან კომუნიკაციაც სამშობლოს ღალატად მეთვლება და ამის გამო, მალე გასამართლებას მიპირებთ.
აზრზე არ ვარ ვინ შემოუშვა. თარჯიმანიც კი ჰყავდათ, ვაი თუ ინგლისური დამვიწყებოდა. რა მექნა? რომელი ღარიბაშვილი ან ნებისმიერი ქოცი ჩინოვნიკი მე ვარ, რომ ენას კბილი დავაჭირო და ყველაფერი ეგრევე არ დავფქვა?
სულ საკნის ნომრების მიხედვით მოვუყევი ჩემი ამჟამინდელი მეზობლების შესახებ. სად ჯარის მძარცველი ზის, სად რეგიონული მნიშვნელობის მაგისტრალის ფულის მომპარავი და სად ბაგა-ბაღების და სკოლების ასაშენებელი ფულის ქურდი.
მე მაინტერესებს, სად არის ამ დროს მამუკა, როდესაც დიფ სტეიტი თარეშობს რუსთავში? სად არის შინაგან სამინისტრო? ბოლოსდაბოლოს, სად არის ნანა კაკაბაძე? შარმანაშვილი?
პ.ს იქნებ დროულად ამოიღოთ ციხის შიდა კამერების ჩანაწერები, სანამ წააშლევინა ბაჩიაშვილმა, – წერს ჯაფარიძე.