“ტვ პირველის” ექსკლუზიური კადრების მიხედვით, შსს-ს თანამშრომლები მოქალაქის მანქანაში იარაღის ჩადებას ცდილობდნენ.
როგორც “ტვ პირველის” მიერ მოპოვებულ კადრებში ჩანს, შსს-ს თანამშრომლები იმყოფებოდნენ გორში, აკო ფიცხელაურის საცხოვრებელი სახლის ტერიტორიაზე.
ვიდეო კადრებით დასტურდება, რომ ორი პირი – გიორგი პატიაშვილი და ალექსანდრე თოფჩიშვილი, ფიცხელაურის სახლის ტერიოტიაზე გადაადგილდებიან.
როგორც ოჯახის წევრები აცხადებენ, სწორედ ეს პოლიციელები ცდილობდნენ ფიცხელაურის ავტომობილში ცეცხლსასროლი იარაღის ჩადებას.
მათივე თქმით, შსს-ს მაღალჩინოსნებს აქამდე კომუნიკაცია ჰქონდათ ფიცხელაურთან იმის შესახებ, რომ მას რაც შეიძლება მალე დაეტოვებინა ქვეყანა, წინააღმდეგ შემთხვევაში ფიცხელაურს დააკავებდნენ, თუმცა რის გამო ცდილობდნენ შსს-ს თანამშრომლები ამ პირის დაკავებას, ამ დრომდე უცნობია.
ოჯახის წევრები ვარაუდობენ, რომ შსს-ს თანამშრომლების გადაადგილება მათი საცხოვრებელი სახლის ტერიტორიაზე, სწორედ ცეცხლსასროლი იარაღის ჩადებას ისახავდა მიზნად.
მას შემდეგ, რაც უწყების თანამშრომლები მანქანას უახლოვდებიან, ირთვება მანქანის სიგნალი, რის შემდეგაც ადგილს სწრაფად ტოვებენ.
“მეტრონომი” დაუკავშირდა აკო ფიცხელაურის ოჯახის წევრს, რომელმაც ჩვენთან საუბრისას დაადასტურა მომხდარი ფაქტი და ასევე განაცხადა, რომ შსს-ს თანამშრომელი, გიორგი პატიაშვილი, რომელიც კადრებში ფიგურირებს, აქამდე არაერთხელ ყოფილა ფიზიკური კონფლიქტისა და დაშინების მონაწილე.
როგორც ოჯახის წევრი ყვება, პატიაშვილი არაერთხელ გაათავისუფლეს სამსახურიდან სწორედ ამ მიზეზის გამო. მისივე თქმით, გიორგი პატიაშვილი და რამდენიმე პოლიციელი, ფიზიკურად გაუსწორდა ყოფილი სუს-ის უფროსის ძმას, რის შემდეგაც კვლავ გაათავისუფლების სამსახურიდან.
აკო ფიცხელაურმა, შსს-ს თანამშრომლების საკუთარ სახლთან მობილიზებისა და იარაღის ჩადების მცდელობის შემდეგ, ქვეყნის დატოვების გადაწყვეტილება მიიღო.