“რაში დასჭირდათ ამ საქმის მაინც და მაინც ახლა “გახეთქვა” – რას წერს რომან გოცირიძე?

რაში დასჭირდათ ამ საქმის მაინც და მაინც ახლა “გახეთქვა” – ამის შესახებ პოლიტიკოსი რომან გოცირიძე სოციალურ ქსელში წერს.

“700 მილიონი დოლარის ეკვივალენტი რუსული რუბლების გათეთრების ამბის შემდეგ კიდევ უფრო აქტუალური ხდება ქვეყნიდან კოლოსალური ოდენობის უცხოური ვალუტის ნაღდი ფულის სახით გატანის საკითხი. მიუხედავად ჩვენი არაერთი მოწოდებისა, ეროვნული ბანკი და მთავრობა დუმს.
საბაჟოს ოფიციალური მონაცემებით, მხოლოდ თბილისის აეროპორტიდან 2023 წელს გატანილი იქნა 1,9 მილიარდი დოლარის ოდენობის უცხოური ვალუტა. შედარებისათვის, 2020 წელს ეს მაჩვენებელი იყო 188 მილიონი დოლარი, ხოლო 2021 წელს 299 მილიონი. რუსეთის უკრაინაში შეჭრის შემდეგ, როგორც ვხედავთ, ეს რიცხვი ექვსჯერ გაიზარდა.
უნდა გასცეს ხელისუფლებამ პასუხი, ვინ გაიტანა ეს ფული და რომელ ქვეყნებში. რუსეთში უცხოური ნაღდი ვალუტის შეტანა აკრძალულია, სანქციებიდან გამომდინარე.
გარდა თბილისის აეროპორტისა, ნაღდი უცხოური ვალუტა გადის ქუთაისისა და ბათუმის აეროპორტებიდან, ასევე სახმელეთო საბაჟო გამშვები პუნქტებიდან( ყაზბეგი, წითელი ხიდი, სადახლო, ვალე, ნინოწმინდა). მანქანებით, არადეკლარირებული( მათ შორის, როგორც აღმოჩნდა, სამალავებით), რამდენი გადის და შემოდის, არავინ იცის.
როდესაც ეროვნული ბანკი და მთავრობა არ იძლევა პასუხს, ეს იმას ნიშნავს, რომ რაღაცას მალავენ და ეს რაღაც მიზნით კეთდება. იმედი უნდა ვიქონიოთ, რომ 700 მილიონი დოლარის სკანდალის შემდეგ მაინც განმარტავენ უზარმაზარი ოდენობით ფულის გატანის საკითხს.
რაც შეეხება ამ 700 მილიონს. თურმე გამოძიება ერთი წლის წინ დაწყებულა, ვალუტის გადამცვლელი აღნიშნული პუნქტი კი დღემდე ჩეულებრივად მუშაობდა და მხოლოდ ორი დღის წინ დაიხურა. რაში დასჭირდათ ამ საქმის მაინც და მაინც ახლა “გახეთქვა” და რა არის აქ ტყუილი და მართალი, ამას დრო გვაჩვენებს”