„ვიღაც ტიპები იყვნენ, რომლებიც გვაგინებდნენ. რომ ამოვყევით, ერთ-ერთი შევარდა აქ [კაფეში] და ვის აგინებთქო რომ ვკითხეთ, ეგრევე კედელთან დადგა და დააძრო იარაღი. წავართვით ეს იარაღი, გამოვიყვანეთ და იარაღი მივეცით პოლიციას, ეს ტიპიც ჩავაბარეთ და მერე საათზე მეტი ხნის განმავლობაში გარეთ არ მიშვებდნენ, ადვოკატსაც დიდი ხანი არ უშვებდნენ.
მერე მითხრეს წამოდი, დაკითხვაზე უნდა გადაგიყვანოთო. ადვოკატთან კონსულტაციის შემდეგ ვუთხარით, რომ მოსამართლის გარეშე არ გამოვიკითხებოდი. როგორც გვითხრეს დაგვიკავშირდებიან… ასე თქვეს რომ დაკავებული გვყავსო და თუ არ წამოხვალ გამოკითხვაზე მოგვიწევს გაშვებაო, ვუთხარი რომ მოსამართლის გარეშე არ გამოვიკითხებოდი“, – თქვა მოქალაქე ლევან ჯობავამ, რომელიც პოლიციას ბესიკის ქუჩაზე მდებარე ერთ-ერთ კაფეში საათზე მეტი ხნის განმავლობაში ჰყავდა შეყვანილი.
საზოგადოებრივი მაუწყებლის შენობიდან წამოსული მარშის მონაწილეები ამბობენ, რომ მათ რამდენიმე ადამიანი დაესხათ თავს, ჯერ სიტყვიერი შეურაცხყოფა მიაყენეს, რაც შემდეგ ფიზიკურ დაპირისპირებაში გადაიზარდა.
აქტივისტი მარიამ მეყანწიშვილი „პუბლიკასთან” ამბობს, რომ, დაახლოებით, 6 ადამიანი იყო და ფიზიკური დაპირისპირების დროს ერთ-ერთ მათგანს, სავარაუდოდ, ცეცხლსასროლი იარაღი ამოუვარდა. მისივე თქმით, ერთ მათგანს დანაც ჰქონდა, დანარჩენები კი გაიქცნენ.