საზოგადოებრივი ჯანდაცვის ექსპერტი გიორგი ფხაკაძე სოციალურ ქსელში ავრცელებს ინფორმაციას დანიასა და ფინეთში ჩატარებული ტყუპების კვლევის შესახებ, რომლის მიხედვითაც ტატუირებულ ადამიანებში კიბოს განვითარების რისკი საგრძნობლად მაღალია.
როგორც გიორგი ფხაკაძე წერს, კვლევის შედეგებით, ტატუირებულ ტყუპებში კიბოს (კანის კიბო ან ლიმფომა) განვითარების რისკი 33%–62%-ით მეტია, ვიდრე მათ არატატუირებულ და-ძმებში. განსაკუთრებით მაღალი რისკი ფიქსირდება დიდი ზომის ტატუების შემთხვევაში. ფხაკაძე მოსახლეობას აფრთხილებს, რომ ტატუ უვნებელი პროცედურა არ არის.
„დიდი ზომის ტატუები (ხელისგულზე უფრო დიდი) განსაკუთრებით საშიშია – ასეთ ადამიანებში რისკი თითქმის გაორმაგდა კანის კიბოსთვის და თითქმის სამჯერ გაიზარდა ლიმფომის შემთხვევაში. სავარაუდო მიზეზი ის არის, რომ ტატუს მელნის ნაწილაკები გროვდება ლიმფურ კვანძებში, იწვევს ქრონიკულ ანთებას და შესაძლოა გახდეს კიბოს სტიმულატორი. ტატუ არ არის უვნებელი. თუ გადაწყვეტთ, აირჩიეთ მხოლოდ ლიცენზირებული სალონი და რეგულარულად დააკვირდით კანს“, – წერს გიორგი ფხაკაძე.