ქალთა პენიტენციურ დაწესებულებაში მყოფი პატიმარი უკვე 5 დღეა პროტესტის უკიდურეს ფორმას მიმართავს: შიმშილობს და პირი აქვს ამოკერილი. ინფორმაციას ამის შესახებ ტვ პირველი ავრცელებს.
პატიმარი ქალი საპყრობილეში არსებულ პირობებს აპროტესტებს, ამასთან პენიტენციური სისტემას მის მიმართ დისკრიმინაციულ მოპყრობაში ადანაშაულებს და აცხადებს, რომ დარღვევების არქონის მიუხედავად მას ვადაზე ადრე გათავისუფლება, ე.წ უდო არ შეეხო.
“ძალიან ბევრი დარღვევაა, უდო არ შემეხო, 4 თვე დამრჩა, ამოვიკერე პირი და დავიწყე შიმშილობა. მივიღე უკიდურესი გადაწყვეტილება. მაღაზია ძვირია წყალი არ გვაქვს. მინდა ხალხმა იცოდეს რა ხდება აქ. მივმართე სახალხო დამცველს, მივმართე ციხის დირექტორს, მაგრამ არანაირი რეაგირება მოუხდენიათ, ისინი ადამიანის ბედით თამაშობენ. თითქოს არც ვარსებობთ, არაადამიანური დამოკიდებულებაა.
უდოზე უარს მეუბნებიან სულ. არანაირი დარღვევა არ მაქვს, მაგრამ მაინც უდოზე სულ უარია. მე პატარა შვილები მყავს, ისინი საქართველოში გაიზარდნენ, მე მათზე ვდარდობ.
დოკუმენტებში წერენ, რომ ვშიმშილობ, ეს კანონდარღვევაა, რატომ არ მაქვს ამის უფლება? როცა მათ შორის იმის გამოც ვშიმშილობდი, რომ ჩემი შვილები მენახა.
საჭმელიც ისეთია, რომ ჭამა არ შეიძლება. მინდა სახელმწიფო ზრუნავდეს ჩვენზე. აქ ერთი კვირა იყო სახალხო დამცველის კომისია, მაგრამ შედეგი – არაფერი“ – აცხადებს პატიმარი ქალი