დღეს, 5 აგვისტოს, თბილისის საქალაქო სასამართლოში 11 დემონსტრანტის საქმე განიხილება. დღეიდან ჯგუფური ძალადობის საქმეზე დაცვის მხარე იწყებს მტკიცებულებების გამოკვლევას. დაიკითხებიან ანდრო ჭიჭინაძის მოწმეები. ინფორმაციას ამის შესახებ “რადიო თავისუფლება” ავრცელებს.
12:45 საათზე სასამართლო დარბაზში ანდრო ჭიჭინაძის საქმეზე მოწმეების დაკითხვა დაიწყო. სხდომათა დარბაზში გამოიძახეს მსახიობი გიგა დათიაშვილი.
“მსახიობი ვარ, მაგრამ ახლა აღარ მაქვს პროფესია” – განაცხადა დათიაშვილმა.
გიგა დათიაშვილი სასამართლოში ჩვენების მიცემისას, ანდრო ჭიჭინაძისა და მის მეგობრობაზე საუბრობს. იგი აქციაზე განვითარებულ მოვლენებსაც იხსენებს და ამბობს, რომ საპროტესტო აქციაზე სპონტანურად ძალიან ბევრი ადამიანი შეიკრიბა. მათ შორის იყვნენ, თავად – გიგა დათაშვილი, ანდრო ჭიჭინაძე და მსახიობი, ირაკლი კვირიკაძე.
“თავიდან, მე ანდრო და ირაკლი ვიყავით, პირველი სკოლის მიმდებარე ტერიტორიაზე, ჭიჭინაძის კუთხეში ან პარლამენტის წინ ვიყავით. შვიდობიანი აქცია იყო, ხალხი იდგა და გამოხატავდა თავის მოსაზრებას/პროტესტს […].
ყველა დღეს აქცია მშვიდ ვითარებაში მიმდინარეობდა, ამ პატრულის თანამშრომლების მიმართ არ ყოფილა არასდროს არანაირი აგრესია. დიალოგში შემოდიოდნენ დემონსტრანტებთან, აქცია იძალებობდა და პირველად დაიძაბა მაშინ, როცა გამოჩნდნენ ე.წ. რობოკოპები და ჩაანაცვლეს პატრულის თანამშრომლები და დაიწყებს აქციის მონაწილეების შეურაცხყოფა, გინება, საშინელ სიტყვებს გვეუბნებოდნენ, ემუქრებოდნენ დაჭერით და ა.შ. რაც აგრესიას იწვევდა, ვიღაც გინებაზე ალბათ გინებით პასუხობდა, იყო რეპლიკები… სიტუაციას აქციაზე ძაბავდნენ შავნიღბიანი ადამიანები… გამოირჩეოდნენ იმით, რომ გამოეყოფოდნენ მორბენალი ადამიანები ამ რობოკოპებს და იყო თავპირის მტვრევა, ადამიანების შეთრევა კორიდორში, ნაცემ ადამიანებს აგდებდნენ უკან, მიგვყავდა ეს თავპირდალეწილი ხალხი სასწრაფოს მანქანებისკენ.
უცნაური იყო, რომ 29-ში მეც რაც დავინახე არავინ დაუკავებიათ, შეითრევდნენ, ცემდნენ და უკან აგდებდნენ… ძალიან მძიმე საყურებელი იყო ეს ყველაფერი” – აღნიშნავს მსახიობი.
მსახიობის თქმით, აქციებზე ყოფნისას მარტივი მისახვედია ვინაა პროვოკატორი და ვინ აქციის მონაწილე.
„ვინც აქციაზეა გამოსული მშვიდობიანად, ის ცდილობს პოლიციას არ მისცეს ლეგიტიმაცია, რომ მათ დაიწყონ აქციის დაშლა… მე შევესწარი შემთხვევას, როცა ერთმა ადამიანმა აიღო რაღაც და ისროლა პოლიციის მიმართულებით. კონფლიქტი დაიწყო, ნიღაბი მოხსნეს ამ ადამიანს და ერთმა უთხრა – შენ დიდუბის პოლიციაში მუშაობო. კონფლიქტი მოჰყვა, არც უარუყვია ამ ნიღბიანს… პროვოცირებდა, რომ ლეგიტიმაცია მიეცა. ეგეთი იყო ბევრი შემთხვევა…ვიცოდით, რომ ახლა რაღაც ჯგუფი გამოჩნდება და დაგვშლიან, ისინი პროვოცირებდნენ”.
ადვოკატი თორნიკე მიგინეიშივილი აზუსტებს, ანუ პოლიციელი იყო ის, ვინც სამართალდამცველების მიმართულებით ისროლაო? – ადასტურებს მოწმე მორიგ ჯერზე თავის მონაყოლს და ამატებს, რომ „მას არც უარუყვია, რომ პოლიციაში მუშაობდა […]
ანდრო ხშირად გვეპარებოდა ხოლმე[იცინის], ადიოდა სპეცრაზმელებთან და გვეუბნებოდა, რომ ვიღაცები უნდა გამოეყვანა. ვიდეომასალაც არსებობს, სოციალურ ქსელში გავრცელდა სპეცრაზმსა და აქციის მონაწილეებს შორის დგას პერანგით და აშველებს მათ და სპეცრაზმი ურტყამს მას, ის უტრიალდება და ეუბნება: რას შვები გამყავსო.
… მოვიდა ანდრო და გვითხრა სპეცრაზმელმა ფეხში სარაჯიშვილის ბოთლი გამარტყაო” – ამბობს სასამართლო ჩვენებაში მსახიობი.
მას შემდეგ, რაც დაცვის მხარემ კითხვების დასმა დაასრულა, პროკურორებმა მსახიობის დაკითხვა გააგრძელა. პროკურორებმა მსახიობს ჰკითხეს, თუ რატომ ფიქრობდა, რომ შესაძლოა 11 დემონსტრანტთან ერთად თავადაც მჯდარიყო.
„ვგულისხმობ იმას, რომ ეს ადამიანები გამოხატავდნენ თავის სამოქალაქო ნებას და იცავდნენ ევროპულ მომავალს”, – პასუხობს მსახიობი.
პროკურორმა გიგა დათაშვილს ჰკითხა, მიუღია თუ არა ისეთ ქმედებებში მონაწილეობა, რაც სამართალდამცავების დაზიანებას გამოიწვევდა.
“პროკურორი: თქვენ თუ მიგიღიათ ისეთ მოქმედებებში მონაწილეობა, რომ გესროლათ რაიმე სამართალდამცველების მიმართულებით
მოწმე: არა, არასდროს
პროკურორი: ქვა?
მოწმე: არა, არასდროს
პროკურორი: ფეიერვერკი?
მოწმე: არა, შეგიძლიათ გააგრძელოთ სხვა ნივთების ჩამოთვლა, იგივე პასუხი მექნება”.
“რადიო თავისუფლება” ლაივბლოგში იმასაც აღნიშნავს, რომ პროკურორი ეკითხება მსახიობს, აქვს თუ არა ვიდეო ნანახი, სადაც „ანდრო ჭიჭინაძე ნივთს ისვრის”.
“კითხვის აცილებას მოითხოვს ადვოკატი, თორნიკე მიგინეიშვილი.
ახლა პროკურორები მოწმეს წარუდგნენე ვიდეოს საქმის მასალებიდან და ეკითხებიან, აქვს თუ არა ნანახი.
„სრულად ჩაურთეთ ვიდეო”, – ითხოვს ადვოკატი.
ვაჟა თოდუა ეკითხება, რას ხედავს – მოწმე პასუხობს, „პოლიციელები იგინებიან”.
„რა იცით, რომ პოლიციელები არიან?” – კითხულობს ვაჟა თოდუა და ღიმილი ეპარება სახეზე.
[ეს კითხვა მნიშვნელოვანია პროკურორებისთვის, რადგან ისინი მთელი 8 თვე ამტკიცებდნენ, რომ „ბრალდებულები ისროდნენ სამართალდამცველების მიმართულებით”.]
ადვოკატი კითხვის აცილებას ითხოვს და მოითხოვს, პროკურორებმა დაკითხონ იმაზე, რაც თავად ნახა და რომ ეს ვიდეო მასთან შემხებლობაში არ არის. კითხვა აცილებულია.
„28-ში, 29-ში და 250-ე დღესაც რუსთაველე ვარ…. ძალიან ბევრჯერ მინახავს როგორ ურტყამდნენ სამართალდამცველები დაგდებულ მოქალაქეს”, – ამბობს გიგა დათიაშვილი.
პროკურორს აინტერესებს, ხომ არ დაუნახავს მოწმეს მოქალაქეები, რომლებიც გამოხატავდნენ პროტესტს ქვების სროლით, პიროტექნიკით, ან ტელევიზიაში ხომ არ უნახავს?”.
მოწმე ამბობს, რომ თავად არ დაუნახავს, მაგრამ კადრებში არ არის დარწმუნებული, რომ ისინი აქციის მონაწილეები იყვნენ.
– თქვენ თუ შეუშალეთ ხელი პროვოკატორებს ვისაც უწოდებთ?
– მოწოდება მქონდა ძალიან ბევრჯერ…
„ფორმაც ხომ არ ეცვა”, – ამას კითხულობს და ეღიმება პროკურორ ვაჟა თოდუას. ის არკვევს მოწმის მიერ მოყოლილი ისტორიის დეტალებს, როცა მისი თქმით, ერთ-ერთი „აქციის მონაწილე“ პოლიციელი იყო და სხვა დემონსტრანტმა ამოიცნო” – წერია “რადიო თავისუფლების” მიერ გამოქვეყნებულ ლაივბლოგში, რომელიც დეტალურად აღწერს, თუ რა ხდება სასამართლო პროცესზე.