რომან გოცირიძე სოციალურ ქსელში პოსტს ავრცელებს, რომელსაც უცვლელად გტავაზობთ.
“ეს არის “ქართუბანკის” მფლობელობის ახალი სტრუქტურა. თუ წინათ ბანკის ასი პროცენტის მფლობელი( არაპირდაპირ, “ქართუფონდის” მეშვეობით) იყო ივანიშვილის მხოლოდ ერთი შვილი, ახლა მას მხოლოდ 35 პროცენტი აქვს, დანარჩენი 65 პროცენტი კი ოფშორებში გადამალულ ფიზიკურ პირებზეა გადაფორმებული. ვინაიდან თითოეულის წილი 5 პროცენტზე ნაკლებია, მათ არა აქვთ ვალდებულება გაამჟღავნონ საკუთარი ვინაობა. ესენი ალბათ ოჯახის სხვა წევრები და ბიძაშვილ-მამიდაშვილები არიან( წესით თხუთმეტამდე უნდა იყვნენ).
ამით ივანიშვილი ცდილობს თავიდან ააცილოს სანქციები “ქართუბანკს”, “ქართუფონდს” და “ქართჯგუფს”, ვინაიდან მათ არ ჰყავთ მესაკუთრედ ისეთი ფიზიკური ან იურიდიული პირი, რომლებიც ამ კომპანიებში ფლობენ წილის 51 პროცენტს ან მეტს.
სინამდვილეში საქმე გვაქვს ფიქტიურ, ნომინალურ მფლობელობასთან. ბევრ იურისდიქციაში, განსაკუთრებით ანტიკორუფციული და სანქციური სამართლის კონტექსტში, გადაწყვეტილებები ეფუძნება ფაქტობრივ მფლობელობასა და კონტროლს და არა მხოლოდ იურიდიულ საკუთრებას.
საქართველოს საგადასახადო კანონმდებლობაშიც არის მსგავსი მუხლი.
შეუძლებელია მილიარდობით ლარის ღირებულების დე ფაქტო მფლობელები იყვნენ ადამიანები, რომლებსაც არსად უმუშავიათ და საკუთარი შემოსავლები არასდროს ჰქონიათ.
ვნახოთ, უშველის თუ არა ეს მანიპულაციები სანქციების გამკაცრების შემთხვევაში.
“ტვ პირველის” წინააღმდეგ სარჩელი, არ მოიხსენიოთ “ქართუბანკი” ივანიშვილის ბანკადო, ძალიან კომიკურია. სასამართლოში ამ სქემას ააფრიალებს და იტყვის, სად წერია აქ ბიძინაო.
ასე იცის შიშებმა, განსაკუთრებით მაშინ, როცა იგი საფუძვლიანია”-წერს რომან გოცირიძე.