11 გარდაცვლილი, ათობით დაშავებული და განადგურებული ათასობით ჰექტარი ტყის მასივი – თურქეთი უკვე მე-4 დღეა დამანგრეველ სტიქიას ებრძვის. ტყის ხანძრებმა ყველაზე მეტად ქვეყნის ჩრდილო-დასავლეთ ნაწილი დააზარალა. გარდაცვლილებს შორის ის მეხანძრე-მაშველები არიან, რომლებიც მოსახლეობის ევაკუაციასა და სტიქიის სალიკვიდაციო სამუშაოებში მონაწილეობდნენ.
250-ზე მეტი მეხანძრე-მაშველი, 70-ზე მეტი სპეციალური ტექნიკითა და 14 თვითმფრინავით ცდილობს ტყის ხანძრის ჩაქრობას კვიპროსში. თურქეთის მეზობლად მაღალი სიცხისგან გაჩენილი ცეცხლის კერა 120 კვადრატულ კილომეტრზეა გავრცელებული. სტიქიას 2 ადამიანი ემსხვერპლა. განადგურებულია კერძო სახლები და მეურნეობები.
ხანძარია ალბანეთშიც, სადაც ვლორის ოლქში ტყე იწვის. სტიქიასთან საბრძოლველად ქვეყანაში იტალიამ და საბერძნეთმა 4 თვითმფრინავი და საგანგებო სიტუაციების მართვის ბრიგადები გაგზავნა.
ტყის ხანძრებთან ერთად, კვლავ მთავარ გამოწვევად რჩება გაუსაძლისი სიცხე. მაღალ ტემპერატურასთან გამკლავებას ცდილობენ საბერძნეთში, სადაც სიცხის მაჩვენებელი 43 გრადუს ცელსიუსს აღწევს. ადგილობრივი მოსახლეობა და ტურისტები გაგრილებას სხვადასხვა საშუალებით ცდილობენ. მაღალი ტემპერატურის გამო, ტურისტული ლოკაციების ნაწილმა ვიზიტორების მიღებაც შეაჩერა.
ტყის ხანძრებთან ბრძოლა მსოფლიოს სხვადასხვა სახელმწიფოში გრძელდება. მაღალი ტემპერატურა და კლიმატური პირობები მეხანძრე-მაშველებისთვის ვითარებას ართულებს, შეფერხებულია სტიქიის სალიკვიდაციო პროცესიც.