თვალჭრელიძის ქუჩაზე გამოჩენილი ნიღბიანი მამაკაცები, რომლებიც ჟურნალისტებს მუქარით ესაუბრებიან და ღია ცის ქვეშ დარჩენილ მოსახლეობას ძალის დემონსტრირებას უწყობენ, არც პოლიციის თანამშრომლები არიან და არც სპეცრაზმელები. დაახლოებით 200-მდე შავ ტანსაცმელში ჩაცმული და შენიღბული პირი თავისუფლად გადაადგილდება კრიმინალური და საპატრულო პოლიციის თანდასწრებით.
ნიღბიანები ქუჩაში გუშინ გამოჩნდნენ. მათი იდენტიფიცირება შეუძლებელია – ისინი არც ვინაობას და არც წარმომავლობას ამხელენ. პოლიციის თანამშრომლებთან კოორდინაციით ეზოში შედიან, კარს კეტავენ და ბინებში დარჩენილი ნივთების გამოტანის უფლებას მხოლოდ ნაწილს აძლევენ, თავად წყვეტენ ვინ შევიდეს და ვინ არა.
როგორც ღია ცის ქვეშ დარჩენილებს თავად ნიღბიანებმა უთხრეს, ისინი კერძო დაცვის კომპანიას წარმოადგენენ, თუმცა კომპანიის სახელი საიდუმლოდ რჩება. ადგილობრივების თქმით, ნიღბიანები შენობის მესაკუთრემ დაიქირავა, რათა ქუჩაში დარჩენილი მოსახლეობა „გაენეიტრალებინა“.