ამ წუთებში მიმდინარე აქციებისას დაპატიმრებული ექიმის, გიორგი ახობაძის სასამართლო პროცესი მიმდინარეობს.
პროცესზე ის სიტყვით გამოვიდა.
„თუ ერთი წინადადებით აღვწერ, ეს საქმე რევანშია ჩემ წინააღმდეგ. ეს რომ რევანშია, მათივე ნათქვამია სხვადასხვა ეტაპზე. მოიფიქრეს ბანალური ჩადების საქმე, რომელიც მათი სავიზიტო ბარათია. რევანშში ჩართულები არიან პოლიციელები, პროკურორები და მოსამართლეები.
ამ პროცესებზე გონიათ რომ ჩვენ გვასამართლებენ, მაგრამ რეალურად საკუთარი თავისთვის გამოაქვთ განაჩენი.
თუ ამის უფლება მაქვს, მინდა, ბრძოლისკენ მოგიწოდოთ, ობრძოლეთ, სანამ გვიანი არ არის. ბოლოს მაინც ჩვენ მოვიგებთ…
ჩემი საქმე იწყება ყალბი პატაკით. ყველა ონფორმაცია სიცრუეა. პოლიციამ სანაპიროზე გამაჩერა, და იძულებით, ფიზიკური ძალის გამოყენებით ჩამიდეს ნარკოტიკი… ჩხრეკის დროს უკანონოდ მოიპოვეს ჩემი ნერწყვის ნიმუში. ცისფერი ხელთათმანების გამოყენებით. გამომისვეს პირში და შემდეგ გადაიტანეს შეკვრაზე…. როგორც კი ჯიბეში ჩამიდეს და მერე ისევ ამოიღეს ეს მათი ნაგავი, მერე აღარც მანქანა უჩხრეკიათ, კაპოტიც კი არ აუხდიათ. აღარც სახლი უჩხრეკიათ… ჩემი დაპატიმრებით დედაჩემს მოწყვიტეს ერთადერთი მომვლელი“, – თქვა ახობაძემ.
შეგახსენებთ, გიორგი ახობაძეს განაჩენს, სავარაუდოდ, დღეს გამოაცხადებენ.
ის 8 დეკემბერს დააკავეს.
ახობაძს წინააღმდეგ გამოძიება სისხლის სამართლის კოდექსის 260-ე მუხლით მიმდინარეობს, რაც ნარკოტიკული საშუალების უკანონო დამზადება, წარმოება, შეძენა, შენახვა, გადაზიდვას ან გადაგზავნას გულისხმობს.