“როდესაც კრიმინალური მენტალობით იმართება სახელმწიფო ინსტიტუციები, ეს ყველაფერზე გადადის,” – ამის შესახებ “ლელო – ძლიერი საქართველოს” ერთ-ერთმა ლიდერმა, ლევან სამუშიამ განაცხადა.
მისი თქმით, “ქართულ ოცნებას” კრიმინალის ზრდაზე საზრუნავად არ სცალია და პოლიტიკური ოპონენტებისა და აქტივისტების დევნისკენ აქვს რესურსი მიმართული.
“როდესაც განუკითხაობაა ქვეყანაში, როდესაც კრიმინალური მენტალობით იმართება სახელმწიფო ინსტიტუციები და სტრუქტურები, ეს ყველაფერზე გადადის და ყველაფერს მოედება.
ვხედავთ, ერთი სროლა ბათუმში, მეორე სროლა ბათუმში, უცხოეთის მოქალაქეების, კრიმინალების თავშეყრის, გარჩევის და შემდეგ ჩაცხრილვის პოლიგონად იქცა ქვეყანა.
აქ თუ სახელმწიფო სტრუქტურები თავის დონეზეა, როგორ შეიძლება მსგავსი რამე ერთხელ თუ მოხდა, მეორეჯერ, მესამეჯერ განმეორდეს.
მათ არ სცალიათ, უნდა სდიონ პოლიტიკურ ოპონენტებს. არ სცალიათ უნდა სდიონ ახალგაზრდებს და აქტივისტებს, პოლიტიკური ტყვეები უნდა ჰყავდეთ ქვეყანაში, პოლიტიკურ ტყვეობაში უნდა ამყოფონ ადამიანები. მთავარი რესურსი აქეთკენ არის მიმართული,” – განაცხადა ლევან სამუშიამ.