„რადიო მარნეულის“ ცნობით, რამდენიმე დღის წინ, მარნეულის მუნიციპალიტეტის სოფელ ყულარში დაჭრილი არასრულწლოვნის ჯანმრთელობის მდგომარეობა გაუმჯობესდა.
არსებული ინფორმაციით, ის უკვე მოხსნილია მართვითი სუნთქვის აპარატიდან, თუმცა მდგომარეობა სტაბილურად მძიმეა.
როგორც აღნიშნული მედია იუწყება, მოზარდს 70-მდე ჭრილობა ჰქონდა მიყენებული.
შეგახსენებთ, მომხდარ ფაქტზე შინაგან საქმეთა სამინისტროს ქვემო ქართლის პოლიციის დეპარტამენტის მარნეულის რაიონული სამმართველოს თანამშრომლებმა, ოპერატიული ღონისძიებებისა და საგამოძიებო მოქმედებების შედეგად, 2006 წელს დაბადებული ა.ა. არასრულწლოვანის მიმართ ჩადენილი განზრახ მკვლელობის მცდელობის ბრალდებით დააკავეს.
დანაშაული 20 წლამდე ვადით თავისუფლების აღკვეთას ითვალისწინებს.
„გამოძიებით დადგინდა, რომ ბრალდებულმა, ურთიერთშელაპარაკების ნიადაგზე, ნაცნობს 2009 წელს დაბადებულ ნ.რ.-ს დანით სხეულის სხვადასხვა არეში მიაყენა ჭრილობები და შემთხვევის ადგილიდან მიიმალა. დაჭრილი ნ.რ. საავადმყოფოში მოათავსეს, სადაც ამ დრომდე შესაბამისი სამედიცინო დახმარება უტარდება.”
დანაშაულის ჩადენის იარაღი – დანა ნივთმტკიცებადაა ამოღებული.
გამოძიება სისხლის სამართლის კოდექსის 19-109-ე მუხლის „ე“ ქვეპუნქტით მიმდინარეობს“, – განაცხადა შსს-მ.