სკოლის მოსწავლე დანაშაულებრივმა დაჯგუფებამ ერთ-ერთი მეტროსადგურის მიმდებარედ ძველ შენობაში აწამა. თბილისში მომხდარი შემზარავი ამბის დეტალები დღეს პროკურატურამ გაასაჯაროვა. საქმის მასალებით ირკვევა, რომ არასრულწოვანი ჯერ აიძულეს, მუხლებზე დამდგარიყო, დაჩოქილს აგინებდნენ, სცემდნენ და ბოლოს ჭრილობები დანით მიაყენეს.
დაკავებულია ე.წ ფაშისტური იდეოლოგიის დაჯგუფების წევრებიც და მათი მეთაურიც. სკოლის მოსწავლის წინააღმდეგ არადამიანურ მოპყრობას რვა პირი ახორციელებდა. ისინი მოზარდს წამებით და იარაღის მუქარით აიძულებდნენ, მათი ე.წ ლიდერისთვის ბოდიშის მოეხადა.
საგამოძიებო უწყების ცნობით, სასტიკი დანაშაული ბრალდებულებმა წარსულში არსებული სიტყვიერი დაპირისპირების საფუძველზე წინასწარ დაგეგმეს და განახორციელეს. როცა დაზარალებულს აწამებდნენ და მის წინააღმდეგ ღირსების შემლახავ ქმედებას ახორციელებდნენ, ამ ყველაფერს მობილურით იღებდნენ. შემზარავი კადრები კი მოგვიანებით სოციალურ ქსელში გაავრცელეს.
სკოლის დაზრალებული მოსწავლე ჯერ კლინიკაში გადაიყვანეს. ახლა კი მძიმე ემოციური მდგომაროების გამო მასთან ფსიქოლოგები მუშაობენ.