“მართალია არალეგიტიმურმა ხელისუფლებამ აკრძალა გადაღება, მაგრამ არსებობს ალტერნატიული გამოსავლები და მოვიტანთ ხმას თქვენამდე,” – ამის შესახებ სინდისის პატიმარმა ნიკოლოზ ჯავახიშვილმა 8 პირის სასამართლო პროცესზე განაცხადა.
ასევე, მან ონისე ცხადაძესა და ვანო ნადირაძის ოჯახის წევრებს მიუსამძიმრა.
პირველ რიგში მინდა მწუხარება გამოვთქვა ონისეს მამის გამო და ვანო ნადირაძის ოჯახის წევრების მიმართ. მინდა გამოვეხმაურო მათე დევიძეს, რომელმაც თქვა, რომ მივდივარ უსასრულო წყვდიადში სინათლის საძებნელადო. მინდა ვუთხრა, რომ დაგველოდე, ჩვენც მოვდივართ შენთან ერთად სინათლის საძებნელად.
მართალია არალეგიტიმურმა ხელისუფლებამ აკრძალა გადაღება, მაგრამ არსებობს ალტერნატიული გამოსავლები და მოვიტანთ ხმას თქვენამდე. მართალია, ოთხ კედელში ვსხედვართ, ყველას უკვირს, რატომ ვიღიმით, მაგრამ “სამშობლო, როგორც უფალი, ერთია ქვეყანაზედა”. დიდება გმირებს! დიდება უკრაინას!
თავისუფლება რეჟიმის ტყვეებს!” – განაცხადა ნიკოლოზ ჯავახიშვილმა.
ცნობისთვის, დღეს, თბილისის საქალაქო სასამართლოში ჯგუფურ ძალადობაში ბრალებული 8 პირის (ირაკლი მიმინოშვილის, ზვიად ცეცხლაძის, ვეფხია კასრაძის, ნიკოლოზ ჯავახიშვილის, გიორგი გორგაძის, ინსაფ ალიევის, ვასილ კაძელაშვილის, თორნიკე გოშაძის) საქმის განხილვა მიმდინარეობს.