ჟურნალისტი თეონა ბაკურიძე წერს:
„5 წლისა და 4 თვის თავზე აჭარის საზოგადოებრივ მაუწყებელს მოუხდა კომპენსაციის გადახდა. მიზეზი უკანონო გათავისუფლებაა.
მაგრამ ახლა ჩემზე არ ვწერ, ახლა არასამთავრობოებზე ვწერ:
ჩემი ინტერესების დაცვა დაიწყო სოციალური სამართლიანობის ცენტრმა, დიდი მადლობა თამთა მიქელაძეს. გარკვეული პერიოდის შემდეგ გააგრძელა „საერთაშორისო გამჭვირვალობა-საქართველომ“.
სრულიად უსასყიდლოდ, დღე და ღამე იშრომა ძალიან კომპეტენტურმა ანა ბერძენიშვილმა იმისთვის, რომ პირველი ინსტანციის სასამართლოს მიკერძოებული გადაწყვეტილება ვეღარ დაეტოვებინა ძალაში მეორე და მესამე ინსტანციას, ეს უბრალოდ შეუძლებელი გამხდარიყო.
იარა საქალაქოში, სააპელაციოში, წერა, იკითხა, აგზავნა წინ და უკან დოკუმენტები. დამეხმარა ბოლომდე – აღსრულების ნაწილშიც კი.
რისთვის გააკეთა ეს? ჩემი, როგორც ჟურნალისტის უფლებების დაცვისთვის, ადამიანისთვის ვინც უკანონოდ გაათავისუფლეს, ვისაც სიცრუე დააბრალეს. ხვალ შეიძლება თქვენ დაგჭირდეთ უფასო იურიდიული დახმარება, მაგრამ მათ ეს შესაძლოა უბრალოდ ვეღარ გააკეთონ.
რატომ? მიზეზი ივანიშვილია, რომელსაც სურს დაგტოვოთ დაუცველები, უკანონობის პირისპირ. ისე რომ ვეღარც თქვენ ხმას გაიგებს ვინმე. ჩემი მაგალითი ალბათ უმცირესია, იმასთან რასაც არასამთავრობოები აკეთებენ ხალხისთვის. მადლობა ეკა გიგაურს, ზვიად ქორიძეს, მალხაზ ჭკადუას“”- წერს თეონა ბაკურაძე.
თეონა ბაკურიძე აჭარის ტელევიზიის მთავარი საინფორმაციო გამოშვების წამყვანი იყო. ის 2020 წელს გაათავისუფლეს. 2024 წლის აპრილში ცნობილი გახდა, ქუთაისის სააპელაციო სასამართლომ ბათილად ცნო აჭარის საზოგადოებრივი მაუწყებლის ყოფილი დირექტორის, გიორგი კოხრეიძის ბრძანებები მისი ეთერიდან მოხსნის და გათავისუფლების შესახებ. აჭარის საზოგადოებრივ მაუწყებელს დააკისრა თეონა ბაკურიძის ექვსი თვის განაცდურის კომპენსაცია.