პრესის საერთაშორისო ინსტიტუტი (IPI) “ქართული ოცნების” მიერ მედიის ჩახშობის მცდელობასთან დაკავშირებით შეშფოთებას გამოთქვამს და წერს, რომ ევროკავშირმა დაუყოვნებლივ უნდა უპასუხოს წევრობის კანდიდატ ქვეყანაში მედიის უპრეცედენტო შევიწროებას.
IPI-ი წერს, რომ საქართველო ყოველდღიურად უახლოვდება ავტორიტარული რეჟიმის მქონე ქვეყნად გადაქცევას, რადგან “ოცნება” აგრძელებს დემოკრატიისთვის “ძირის გამოთხრას და დამოუკიდებელი ხმების ჩახშობას”.
“IPI-ის გლობალური ქსელი, დღეს, საქართველოში მედიის თავისუფლების სავალალო მდგომარეობის შესახებ, სულ უფრო რეპრესიული კანონების შემოღების და პრესაზე მიმდინარე თავდასხმების ფონზე, გაფრთხილებას გამოსცემს. ყოველდღიურად საქართველო უახლოვდება სრულად კონსოლიდირებულ ავტორიტარულ რეჟიმად გადაქცევას, რადგან მმართველი პარტია “ქართული ოცნება” აძლიერებს ძალისხმევას დემოკრატიის ძირის გამოთხრისა და დამოუკიდებელი ხმების ჩახშობის მიმართულებით.
ბოლო კვირაში “ქართულმა ოცნებამ” მიიღო კანონმდებლობა, რომელიც ჟურნალისტების ცილისწამებისთვის სისხლისსამართლებრივი დევნას გაცილებით ამარტივებს, მან დააწესა ახალი შეზღუდვები სასამართლოებიდან რეპორტაჟებზე და ბათუმის სასამართლომ მზია ამაღლობელის პატიმრობა გააგრძელა, მიუხედავად სამედიცინო დასკვნებისა, რომ მისი მხედველობა საშიშად გაუარესდა ციხეში ყოფნის დროს,” – წერია განცხადებაში.
IPI-ი ასევე წერს, რომ საერთაშორისო საზოგადოებას, განსაკუთრებით კი ევროკავშირს ევალებათ ახლავე იმოქმედონ, რათა დაგმონ და ეფექტური ზეწოლა მოახდინონ “ქართულ ოცნებაზე”, ინსტიტუტების ლიდერებსა და მოსამართლეებზე, რომლებიც პასუხისმგებელნი არიან როგორც მედიის, ასევე სამოქალაქო საზოგადოების შევიწროებაზე.
IPI-ის განცხადებით, “ქართული ოცნების” მიერ შემოღებული კომბინირებული ცვლილებები საფრთხეს უქმნის საქართველოში დამოუკიდებელი ჟურნალისტიკის საფუძვლებს.