“სტრატეგია აღმაშენებლის” ლიდერი, გიორგი ვაშაძე ციხიდან წერილს აქვეყნებს:
„კარგად ვარ. სიახლეა ის, რომ გწერთ 308-ე საკნიდან.
გააზრებული მაქვს აქ რისთვის ვარ. არ ვარ პირველი, ვინც ამ გზას გადის. ყოველი ასეთი გზა არის მტკიცებულება, რომ პოლიტიკური დევნა შედეგს ვერ იძლევა.
შეუძლებელია თავისუფლების, აზრის დატყვევება. ეს არის ყველა ავტოკრატის და მოძალადის მთავარი შეცდომა და მათი მარცხის დასაწყისი.
პატიმარი არის არა ის, ვინც ფიზიკურად დაატყვევეს, არამედ ის, ვინც გარეთ არის და ვერ იაზრებს თავისუფლების არსს.
აქ ყოფნით კიდევ ერთხელ დადასტურდა, მე და სხვა ჩემი მეგობარი ლიდერები პოლიტიკაში არ ვართ პირადი კომფორტისთვის. ასე რომ ყოფილიყო, დღეს აქ არ ვიქნებოდით.
ეს არის ბრძოლა საქართველოსთვის, შვილების უკეთესი და დაცული მომავლისთვის.
რეჟიმი მარცხისთვისაა განწირული. ის ამას გრძნობს, ამიტომ ებრძვის ყველას ვერაგულად. ბევრისთვის ჩვენი გზა შეიძლება რთულია, მაგრამ სიმართლისა და გამარჯვების გზა არასდროს არის მარტივი.
მოლაპარაკება მათთან შეუძლებელია. მათ საბოლოოდ დაკარგეს ფასიც და სახეც ამიტომ ჩვენი იარაღია: ერთობა, ღირსება და ბრძოლა ბოლომდე!
აუცილებლად გავიმარჯვებთ!”, – წერს „სტრატეგია აღმაშენებლის” ლიდერი გიორგი ვაშაძე წერილში.
შეგახსენებთ, 24 ივნისს სასამართლომ გიორგი ვაშაძეს 7-თვიანი პატიმრობა მიუსაჯა და საჯარო სამსახურში თანამდებობის დაკავება 2 წლით აუკრძალა.
გიორგი ვაშაძეს პროკურატურა საგამოძიებო კომისიის მოთხოვნის შეუსრულებლობას ედავებოდა.