ირაკლი კობახიძემ ახალი საკანონმდებლო ცვლილება წარადგინა ნარკოპოლიტიკასთან დაკავშირებით.
მისი განცხადებით, აიკრძალება ჩანაცვლებითი თერაპიის განხორციელება კერძო სუბიექტების მიერ.
“ნარკომანიის ჩანაცვლებითი პროგრამები კერძო და სახელმწიფო სუბიექტების მიერ ხორციელდება. საზოგადოებაში არსებობს ვარაუდი, რომ კერძო სუბიექტების მიერ გაწეული მომსახურება არა პაციენტის განკურნებას, არამედ ნარკოტიკული საშუალების ლეგალურად მიწოდებას ისახავს მიზანს.
მივიღეთ გადაწყვეტილება, სრულად ავკრძალოთ ჩანაცვლებითი თერაპიის განხორციელება კერძო სუბიექტების მიერ. მნიშვნელოვანია სრული პასუხისმგებლობა აიღოს სახელმწიფომ. გამკაცრდება კონტროლი ჩანაცვლებითი პროგრამების სახელმწიფოს მიერ განხორციელებაზე. ჯანდაცვის მინისტრს ვთხოვე უზრუნველყოს ჩანაცვლებითი თერაპიის ინფრასტრუქტურის მაქსიმალურად მოკლე ვადებში გატანა მჭიდროდ დასახლებული სივრცეებიდან.
[…]
მეორე ინიციატივა ფსიქოტროპული მედიკამენტების არასამედიცინო ნარკოტიკული დანიშნულებით გამოყენებას უკავშირდება. ზედაპირული ანალიზი ცხადყოფს, რომ დღეს საქართველოში ფსიქოტროპული მედიკამენტების, განსაკუთრებით – ბენზოდიაზეპინების, მოხმარება გონებრივ მაჩვენებელს მნიშვნელოვნად აღემატება, რაც ამყარებს საზოგადოების საფუძვლიან ეჭვს იმასთან დაკავშირებით, რომ ნარკოტიკული დანიშნულებით ამ მედიკამენტების გამოყენება საქართველოში ფართოდ გავრცელებული პრაქტიკაა.
დღეს საქართველოში ფსიქოტროპული მედიკამენტების იმპორტს ახორციელებენ კერძო სუბიექტები… სრულად აიკრძალება ფსიქოტროპული მედიკამენტების იმპორტი კერძო კომპანიების მიერ… მუდმივ რეჟიმში ყურადღებით დავაკვირდებით ფსიქოტროპული მედიკამენტების გამოყენების სტატისტიკას და ამ სტატისტიკის არსებითი შეფასება იქნება უტყუარი ინდიკატორი იმისა, რომ სახელმწიფომ ფსიქოტროპული მედიკამენტების არადანიშნულებისამებრ გამოყენება წარმატებით აღკვეთა”, – განაცხადა ირაკლი კობახიძემ.