“პირველების“ ინფორმაციით, საპატრიარქო გიორგი ჯამდელიანის შესაძლო ლიკვიდაციის საქმეზე ვრცელი წერილის გამოქვეყნებას აპირებს, რომელსაც სინოდის წევრები მოაწერენ ხელს.
აღნიშნული წერილი უკვე მზადაა, თუმცა, უცნობია, როდის გამოქვეყნდება ის.
ეპისკოპოსი დღეს საპატრიარქოში იმყოფებოდა და სინოდის წევრებს 4 საათზე მეტი ესაუბრებოდა. გიორგი ჯამდელიანმა “პირველებს“ უთხრა, რომ პროკურატურასთან თანამშრომლობაზე უარს ამბობს.
მიმდინარე წლის 8 ივნისს, მაღალმა იერარქმა ამბიონიდან თქვა, რომ ახლო წარსულში ხელისუფლების წარმომადგენელი მის მოწამვლას გეგმავდა და ამ მიზნით მონაზონიც ჰყავდა გადაბირებული, რომელსაც ეპარქიიდან ინფორმაციები გაჰქონდა.
პროკურატურამ მარნეულისა და ჰუჯაბის ეპისკოპოსის მეუფე გიორგი ჯამდელიანის მიერ გაკეთებული განცხადების საფუძველზე, გამოძიება სისხლის სამართლის კოდექსის 18,108-ე მუხლით დაიწყო, რაც განზრახ მკვლელობის მომზადებას გულისხმობს.
მარნეულისა და ჰუჯაბის ეპისკოპოსმა გიორგიმ „TV პირველს“ განუცხადა, რომ არ გეგმავს ჩვენება მისცეს საგამოძიებო უწყებებს 8 ივნისს მკვლელობის შესახებ გაკეთებულ განცხადებაზე.
მოგვიანებით, მარნეულის ეპარქიამ განცხადება გაავრცელა, რომლის თანახმად, გ.შ.-ს (სავარაუდოდ გიორგი შინჯიკაშვილს) ეპისკოპოს ჯამდელიანის მკვლელობის მცდელობა დაუდგინა და ზიარება აუკრძალა.
14 ივნისს “ნოდარ მელაძის შაბათმა” წყაროს მიერ მიწოდებული აუდიო-ჩანაწერი გაასაჯაროვა, რომელიც კონფიდენტის თქმით, მარნეულისა და ჰუჯაბის ეპისკოპოსის, გიორგი ჯამდელიანისა და იმ მონაზვნის საუბარს ასახავს, რომელიც სავარაუდოდ, ამ ეპისკოპისის გასანეიტრალებლად გადაიბირეს.
ჩანაწერის მიხედვით, მონაზონი ეპისკოპოსს ეუვნაბა, რომ შიდა ქართლის გუბერნატორის მოადგილე, გიორგი შინჯიკაშვილი მისი მოწამვლის გეგმას თვეების განმავლობაში ამუშავებდა. ამავე აუდიო ჩანაწის თანახმად, მონაზონიწმინდა სინოდის წევრს ეუბნება, რომ მისი ლიკვიდაციის სურვილი დღის წესრიგიდან ახლაც არ არის მოხსნილი.