ნიკა გვარამია საგამოძიებო კომისიაზე მეორედ დაიბარეს – პარტია „ახალი” განცხადებას ავრცელებს

რუსთავის მე-12 სასჯელაღსრულების დაწესებულებაში  ნიკა გვარამიას მიმართ საგამოძიებო კომისიაზე გამოცხადების მოთხოვნა მეორედ გაიგზავნა.

პარტია „ახალის“ განცხადებით, მათი პოზიცია უცვლელია — ნიკა გვარამია არ ითანამშრომლებს „რეჟიმის მიერ შექმნილ კომისიასთან,“ რომელსაც პარტია ეროვნული ინტერესების ღალატსა და ისტორიის გადაწერაში ადანაშაულებს.

„არც ერთ ეტაპზე არ ვაპირებთ მივიღოთ რეჟიმის თამაშის წესები, მივანიჭოთ მცირედი ლეგიტიმაცია მაინც და ვითანამშრომლოთ ე.წ. კომისიასთან,“ — ნათქვამია განცხადებაში.

პარტიის თქმით, მათი სტრატეგია ემყარება თანმიმდევრულობას, პრინციპულობას და ართანამშრომლობას, რაც, მათივე შეფასებით, არის გამარჯვების გზა.

ცნობისთვის, საგამოძიებო კომისიაზე გამოუცხადებლობის გამო, ნიკა გვარამიას აღკვეთის ღონისძიების სახით 30 000-ლარიანი გირაო შეუფარდეს. გირაოს გადახდის ვადა 7 ივნისს ამოეწურა. გვარამიამ ის არ გადაიხადა. შედეგად, 13 ივნისს, „კოალიცია ცვლილებისთვის“ ლიდერს, ნიკა გვარამიას სასამართლომ პატიმრობა შეუფარდა.