“მათეს განაჩენის გამოტანით არაფერი მორჩება. ჩვენ არ გავჩერდებით, არ დავნებდებით და ვერ შეგვაშინებენ. ბოლომდე დავამტკიცებთ, რომ მათე მართალია” – ამბობს მათე დევიძის და, ელენე დევიძე “ტვ პირველის” ეთერში.
ელენე დევიძე აცხადებს, ელოდებოდა კიდევაც, რომ “ოცნება” “არ დანებდებოდა” და “მოსამართლე რეჟიმს დაემორჩილებოდა”.
“სიმართლე გითხრათ, ველოდით კიდეც, რომ რეჟიმი არ დანებდებოდა და მსგავსი დასასრული წარმოდგენილი გვქონდა, მაგრამ ბოლომდე ვიტოვებდით იმედს, რომ მოსამართლე ტვინს იხმარდა, რაღაცას შეცვლიდა და კარგისკენ წაიყვანდა თავის საქმესაც, მათესაც და ქვეყანასაც. ეს ძალიან სჭირდებოდა ჩვენს ქვეყანას, მაგრამ ასე არ მოხდა. მოსამართლე დაემორჩილა ისევ რეჟიმს. ცდილობენ, რომ უფსკრულისკენ წაგვიყვანონ, საითაც ამდენი ხანია მივყავართ. მათეს განაჩენის გამოტანა არაფერს წყვეტს, არაფერი მორჩება ამით. ეს ძალიან კარგად უნდა გაიგონ გალუსტაშვილმაც და სხვებმაც. ჩვენ არ გავჩერდებით, არ დავნებდებით, ვერ შეგვაშინებენ. ბოლომდე დავამტკიცებთ, რომ მათე მართალია”. – განაცხადა ელენე დევიძემ.
პოლიციელზე თავდასხმაში ბრალდებული 21 წლის მათე დევიძე სასამართლომ ნინო გალუსტაშვილმა დამნაშავედ ცნო და მას 4 წლითა და 6 თვის ვადით თავისუფლების აღკვეთა მიესაჯა.
დევიძეს ბრალდება სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.