“საერთაშორისო გამჭვირვალობა – საქართველოს” რეგიონული ოფისების ხელმძღვანელი, ზვიად ქორიძე საქართველოსთან უვიზო რეჟიმის სამომავლოდ გაუქმების თაობაზე დონალდ ტუსკის განცხადებას ეხმიანება და მას “ქართული ოცნების” ქმედებების პასუხად აფასებს.
“ტუსკის ეს განცხადება პასუხია იმაზე, რომ ევროკავშირი ძალიან დაიღალა იმით, რომ საქართველოს ხელისუფლება, “ქართული ოცნება” დაუღალავად ეუბნება მათ, რომ საქართველოს არ უნდა სამართლიანი მართლმსაჯულების სისტემა, საქართველოს არ უნდა გამოხატვის თავისუფლების პრინციპის დაცვა, საქართველოს არ უნდა საკუთრების თავისუფლების პრინციპის დაცვა. ეს არის სამი მნიშვნელოვანი ბოძი, რაზეც დგას დემოკრატია. ეს არ არის მარტო დღეს მოგონილი სიბრძნეები.” – განაცხადა ზვიად ქორიძემ.
პოლონეთის პრემიერ-მინისტრმა, დონალდ ტუსკიმ პარლამენტში არალეგალურ მიგრაციაზე საუბრის დროს საქართველოც ახსენა – ტუსკიმ თქვა, რომ ევროკავშირის მასშტაბით საჭირო უმრავლესობას შეკრავს, რათა შეზღუდოს ან შეაჩეროს უვიზო მიმოსვლა სხვადასხვა ქვეყნებთან, მათ შორის საქართველოსთან.