ეროვნული გვარდია ლოს ანჯელესში დარჩება იქამდე, ვიდრე ვითარება უსაფრთხო არ გახდება, – ამის შესახებ აშშ-ის პრეზიდენტმა, დონალდ ტრამპმა განაცხადა.
„გუშინდელი ღამე საშინელი იყო. წინა ღამეც საშინელი იყო. ადამიანები დიდი, მძიმე ჩაქუჩებით ურტყამდნენ ბეტონს და ბორდიურებს, ურტყამდნენ, ამტვრევდნენ და ხალხს აძლევდნენ ბეტონის დიდ ნაჭრებს. ისინი იღებდნენ ამ ბეტონს, ადიოდნენ ხიდებზე და ყრიდნენ მანქანის სახურავზე. ისინი ესროდნენ ჩვენს პოლიციას. ისინი ესროდნენ ჩვენს ჯარისკაცებს, რომლებიც იქ არიან და ჩვენ ეს შევაჩერეთ. ახლა ისინი დაკავებული გვყავს. შეხედეთ, ახლა რომ არ ჩავრთულიყავით, ლოს ანჯელესი ისევე დაიწვებოდა, როგორც რამდენიმე თვის წინ იწვოდა“, – განაცხადა ტრამპმა.
ჟურნალისტის კითხვაზე, როდის ესაუბრა ბოლოს კალიფორნიის გუბერნატორ გევინ ნიუსომს, ტრამპმა უპასუხა, რომ მას ერთი დღის წინ ესაუბრა.
„ერთი დღის წინ დავურეკე და ვუთხარი, რომ უკეთ უნდა იმუშაოს. ის საქმეს ცუდად აკეთებს, ბევრ სიკვდილს იწვევს“, – აღნიშნა ტრამპმა.
ამასთან, აშშ-ის პრეზიდენტის განცხადებით, იმ შემთხვევაში, თუ დადგინდება, რომ ლოს ანჯელესში მიმდინარე საპროტესტო აქციები ამბოხია, შესაბამის კანონს აამოქმედებს.
„ამბოხება თუ იქნება, მე აუცილებლად ავმოქმედდები. მე შემიძლია, გითხრათ, რომ ლოს ანჯელესში იყო გარკვეული რაიონები, სადაც შეიძლება ითქვას, რომ ეს ხდებოდა. ეს საშინელება იყო, მაგრამ ისინი ამაში ფულს იღებდნენ. ესენი იყვნენ ანაზღაურებადი ამბოხებულები. ისინი ამაში ფულს იღებდნენ“, – განაცხადა ტრამპმა.
კალიფორნიაში არეულობა პარასკევს დაიწყო. საიმიგრაციო სამსახურების რეიდების წინააღმდეგ გამოსული დემონსტრანტები შტატის რამდენიმე ქალაქში სამართალდამცველებს დაუპირისპირდნენ. არეულობის ფონზე აშშ-ის პრეზიდენტმა ლოს ანჯელესში ეროვნული გვარდიის 4 ათასი წევრის და 700-მდე საზღვაო ქვეითის განთავსების განკარგულება გასცა.