ხაშურის რეფერალური ჰოსპიტლის დირექტორის განცხადებით, სახლში უგონო მდგომარეობაში ნაპოვნი ქალი ამ დრომდე მართვით სუნთქვაზე იმყოფება და მისი მდგომარეობა კვლავ მძიმეა. ამის შესახებ ექიმმა “TV პირველს” განუცხადა.
როგორც ის განმარტავს, ორგანული პათოლოგიების ნაწილი უკვე გამორიცხულია, თუმცა კვლავ რჩება რამდენიმე საეჭვო დიაგნოზი, რომელთა დასაზუსტებლად დამატებითი კვლევებია საჭირო.
„ამ ეტაპზე, არის მძიმე მდგომარეობა. მართვით სუნთქვაზე იმყოფება. გრძელდება კვლევები, რომლებიც შემოსვლისთანავე დაიწყო. ერთმნიშვნელოვანი პასუხი მას შემდეგ გვექნება, რაც ყველა კვლევის პასუხს მივიღებთ. საკვების სახით მიღებულ პროდუქტებზეც არის ეჭვი, რომელიც ლუგარის ლაბორატორიაშია გაგზავნილი. ზუსტად ვერ გეტყვით, როდის იქნება ლუგარის ლაბორატორიიდან პასუხები . საბოლო ჯამში მათი პასუხები იქნება მნიშვნელოვანი და გადამწყვეტი. გამორიცხულია სხვადასხვა ორგანული პათოლოგიური, თუმცა ჯერ კიდევ რჩება რამდენიმე საეჭვო დიაგნოზი”,- აცხადებს კლინიკის დირექტორი.
შეგახსნებთ, ხაშურში გაურკვეველ ვითარებაში გარდაიცვალა 9 წლის ბიჭი. სამსახურიდან შინ დაბრუნებულ მამაკაცს 9 წლის შვილი გარდაცვლილი, მეუღლე კი უგონო მდგომარეობაში დახვდა. მომხდარზრ გამოძიება სსკ-ს 116-ე მუხლით მიმდინარეობს, რაც გაუფრთხილებლობით სიცოცხლის მოსპობას გულისხმობს.