საზოგადოებრივი მაუწყებლის გადაცემა რეალური სივრცის გუნდმა არხს სასამართლოში უჩივლა.
გადაცემის კორესპონდენტი თამარ მშვენიერაძე Facebook-ზე წერს, რომ თანამშრომლებმა სარჩელი დღეს დაარეგისტრირეს.
საზოგადოებრივმა მაუწყებელმა გადაცემა რეალური სივრცის თანამშრომლები არხის პოლიტიკის კრიტიკის გამო გაათავისუფლა. 5 მაისს ცნობილი გახდა, რომ მენეჯმენტმა პროექტი დახურა, მას შემდეგ, რაც გადაცემის წამყვან ნინო ზაუტაშვილთან შრომითი ურთიერთობა გაწყვიტა.
საზოგადოებრივმა მაუწყებელმა ნინო ზაუტაშვილი და ვასილ ივანოვ-ჩიქოვანი სამსახურიდან 11 აპრილს გაათავისუფლა, კიდევ 4 თანამშრომლის: რეალური სივრცის კორესპონდენტისა და წამყვანის, თამარ მშვენიერაძისა და იოსებ კაციტაძის, პულტის რეჟისორის და შეთავსებით სპორტული არხის რეჟისორის, კახაბერ მელიქიძის, ბრენდინგისა და პრომოციის ჯგუფის რეჟისორის, ირმა ჩუბინიძის მიმართ კი სხვა სახის დისციპლინური სანქცია გამოიყენა.
თინათინ ბერძენიშვილმა მათ “მაუწყებლობის სარედაქციო დამოუკიდებლობის და მიუკერძოებლობის ეჭვქვეშ დაყენებითა და ამის შედეგად, დამსაქმებლისთვის რეპუტაციული ზიანის მიყენების” გამო საყვედური გამოუცხადა და თანამშრომლები 12 თვის განმავლობაში “ანალოგიური ან/და სხვა სახის დარღვევის შემთხვევაში” შესაძლო გათავისუფლების შესახებ გააფრთხილა.
ტელევიზიის შეფასებით, “მიღებული გადაწყვეტილება არის სამართლიანი, მიუკერძოებელი და სამართლებრივად დასაბუთებული”.