“დღეს რეჟიმმა გურამ ხუტაშვილს და დანიელ მუმლაძეს საკუთარი სახე კიდევ ერთხელ აჩვენა” – ასე აფასებს ეროვნული ბანკის ყოფილი პრეზიდენტი, გიორგი ქადაგიძე სამეთვალყურეო კამერების დაზიანების გამო, ახალგაზრდების 3-წლით ციხეში გაშვების ფაქტს.
როგორც ქადაგიძე “ტვ პირველის” ეთერში განმარტავს, ბოლო პერიოდში განვითარებული მოვლენებიდან გამომდინარე ცხადი ხდება, რომ საქართველოში “სასამართლო და სამართალი არ არსებობს”.
დღეს, რამდენიმე საათის წინ, ორ ახალგაზრდას შეუფარდეს სამ-წლიანი პატიმრობა, გარე კამერების დაზიანებისთვის, როგორც სახელმწიფო ქონების. გურამ ხუტაშვილს და დანიელ მუმლაძეს დღეს რეჟიმმა კიდევ ერთხელ აჩვენა საკუთარი სახე. აი ეს არის მათი სამართალი. სასამართლო არ არსებობს. ყველანაირი პოლიტიკური შეფასების მიღმა არის ეს, რასაც ახლა ჩვენ ვხედავთ”, – ამბობს გიორგი ქადაგიძე.
26 წლის გურამ ხუტაშვილი და 23 წლის დანიელ მუმლაძე პროკურატურის მოთხოვნის საფუძველზე სამი წლით ციხეში გაუშვეს. სახელმწიფო ბრალდება მათ 2024 წლის გაზაფხულის აქციების დროს სამეთვალყურეო კამერების დაზიანებას ედავებოდა. ეს დანაშაული დაკავებულებმა აღიარეს. ახალგაზრდები მზად იყვნენ, სახელმწიფოსთვის 12 100-ლარიანი ზარალი აენაზღაურებინათ, თუმცა მოსამართლემ ეს ფაქტორი არ გაითვალისწინა.