შალვა პაპუაშვილი პოლონეთის საელჩოს განცხადებას ეხმაურება და ამბობს, რომ უცხო ქვეყნის მოქალაქეს არაფერი ესაქმება სხვა ქვეყნის დემონსტრაციაზე.
“ზოგადად, უცხო ქვეყნის მოქალაქეს არაფერი ესაქმება სხვა ქვეყანაში დემონსტრაციაზე. სხვათა შორის, აშშ-ის სახელმწიფო დეპარტამენტი, ამ მხრივ ძალიან მკაფიო პოლიტიკას ატარებს, როდესაც მათ შორის, ვიზას უჩერებს იმ ადამიანებს, რომლებიც ნაცვლად იმისა, რომ ვიზის დანიშნულებით იმყოფებოდნენ აშშ-ში, დაკავებულები არიან სხვადასხვა მთავრობის საწინააღმდეგო პროტესტით…
როდესაც პოლონეთის მოქალაქე დაინახავს, რომ პოლონეთის ელჩი ერევა შიდა საკითხებში, როდესაც ესტონეთის მოქალაქე დაინახავს, რომ ესტონეთის ელჩი ერევა შიდა საკითხებში, იმასაც ჰგონია, რომ ეს თავისთავადია, ჩახვიდე უცხო ქვეყანაში და თავს მოახვიო საზოგადოებას შენი პოლიტიკური მოსაზრებები“, — აცხადებს შალვა პაპუაშვილი.
ცნობისთვის, საქართველოში პოლონეთის საელჩომ განცხადება გაავრცელა, სადაც პოლონეთი თავის მოქალაქეებს აფრთხილებს, გამგზავრებამდე გაითვალისწინოს, არსებობს თუ არა კონკრეტულ შემთხვევაში ფაქტორები, რომლებიც საქართველოში შესვლაზე უარის თქმის რისკს გაზრდის.
პოლონეთი ასევე აფრთხილებს თავის მოქალაქეებს, რომ მათ, ვინც დემონსტრაციებში მიიღებს მონაწილეობას, შესაძლოა, ჯარიმები დაეკისროს.