რომან გოცირიძე ევროკავშირის მხრიდან საქართველოსთვის უვიზო მიმოსვლის შესაძლო გაუქმებას ეხმაურება.
“უვიზო მიმოსვლის გაუქმება არის უდიდესი დარტყმა ქვეყნისათვის. ეს იქნება არა მთავრობის, არამედ ხალხის დასჯა. მიდგომა, რომ რაც უფრო ცუდი რამ მოხდება, უფრო გამოიწვევს ამ ხელისუფლების დემონტაჟს, არ არის სწორი. ეს მიდგომა ჰგავს ზოგიერთების იმ პოზიციას, როცა მიაჩნდათ, რომ ევროკავშირის წევრობის კანდიდატის სტატუსი არ უნდა მიგვეღო ამ ხელისუფლების პირობებში, რადგან ეს გააძლიერებდა მას.
სტატუსი პირველ რიგში აძლიერებს ქვეყანას. მასზე უარის თქმა შეიძლება გახდეს ამ ხელისუფლების მესაფლავე. საქართველოსთვის არნახული მასშტაბის საპროტესტო აქციები როგორც რაოდენობის, ასევე დროის ხანგრძლივობის თვალსაზრისით, სწორედაც რომ ევროკავშირში გაწევრიანების შეფერხების ფაქტმა გამოიწვია.
ეს გადაგვარებული რეჟიმი აუცილებლად შეიცვლება და ეს უნდა მოხდეს ქვეყნისათვის ნაკლები ზიანის მიყენების გზით.
ხელისუფლების მიერ ბოლო პერიოდში განხორციელებული საკანონმდებლო ცვლილები ფაქტობრივად ამთავრებს რეპრესიების კიდევ უფრო გაღრმავების სამართლებლივი საფუძვლების შექმნას. შემდეგ უკვე პრაქტიკის საქმეა. ვითარება არის იმაზე საშიში, ვიდრე ერთი შეხედვით ჩანს. ამ ვითარებას სჭირდება ადეკვატური პასუხი. ეს პასუხი საყოველთაო დაუმორჩილებლობა უნდა იყოს ( პირველ რიგში მთელი ქვეყნის მასშტაბით გაფიცვების ორგანიზების გზით).
ივანიშვილის მიზანია ქვეყანა დაამსგავსოს რეგიონში არსებული ( მეზობელი) ქვეყნების მართვის სტილს. ამისკენ მიიწევს ნაბიჯ-ნაბიჯ და დროზე უნდა შევაჩეროთ.”- წერს რომან გოცირიძე.