“ჩემი გათავისუფლების საფუძველი არ არსებობდა” – ნინო ზაუტაშვილი

პირველი არხიდან ჩემი გათავისუფლების საფუძველი არ არსებობდა, – ამის შესახებ ჟურნალისტმა ნინო ზაუტაშვილმა “ტვ პირველის” პირდაპირ ეთერში განაცხადა.

მისივე თქმით, არხის მოქმედი მენეჯმენტის მიმართ კრიტიკულად განწყობილი ჟურნალისტები იმის გამო დაითხოვეს, რომ პირველი არხის ყოფილი თანამშრომლები საზოგადოებისთვის საეთერო დროის დათმობას ითხოვდნენ.

“მაყურებელი ვერ ხედავდა იმ ადამიანებს ეთერში, რომლებსაც დღეს პრობლემა აქვთ” – აღნიშნა ნინო ზაუტაშვილმა.

მარტივად მინდა ვთქვა. მესმის, რომ ადამიანთან შეიძლება უკვე ის მდგომარეობა გაქვს, რომ უნდა წავიდეს, რადგან შესაძლებლობები ამოწურა. გათავისუფლების ფორმა არსებობს ცივილური, კულტურული. კოლექტივისთვის ინფორმაციის მიწოდების ფორმა არის ცალკე კულტურა, რომელიც ჩვენს მენეჯმენტს არ აღმოაჩნდა. არანაირი საფუძველი არ არსებობს ჩემი გათავისუფლების. გაურკვეველი მოკვლევაა მოტანილი. მოკვლევა ეხება იმას, რომ ჩვენ დღის ეთერების გახსნას ვითხოვდით. მაყურებელი ვერ ხედავდა იმ ადამიანებს ეთერში, რომლებსაც დღეს პრობლემა აქვთ. ესენი არიან პატიმრობაში მყოფი ახალგაზრდები, მათი მშობლები, ადამიანები, რომლებიც აპროტესტებენ.” – განაცხადა ნინო ზაუტაშვილმა. 

ცნობისთვის, ვასილ ივანოვ-ჩიქოვანი და ნინო ზაუტაშვილი საზოგადოებრივი მაუწყებლიდან გუშინ, 11 აპრილს გაათავისუფლეს. ჟურნალისტებს შესაბამისი გადაწყვეტილება საზოგადოებრივი მაუწყებლის გენერალურმა დირექტორმა, თინათინ ბერძენიშვილმა გააცნო.

ამასთან, ცნობილი გახდა, რომ პირველი არხის გენერალურ დირექტორს, თინათინ ბერძენიშვილს ტელევიზიიდან გათავისუფლების მოთხოვნით თეა კახიანმა მიმართა. თეა კახიანი განცხადების შინაარს სოციალურ ქსელში ავრცელებს. ასევე, კახიანი წერს, რომ არხი დავით ველიჯანაშვილმაც დატოვა.

საყურადღებოა ისიც, რომ საზოგადოებრივმა მაუწყებელმა შრომითი კონტრაქტი არ გაუგრძელა რადიოგადაცემების “შუადღის პიკისა” და “საღამოს პიკის” პროდიუსერის ასისტენტს, ანა მეტრეველს.