თანაინვესტირების ფონდის ყოფილი ხელმძღვანელის, გიორგი ბაჩიაშვილის უცხოელი ადვოკატები, ბაჩიაშვილის შესაძლო ლიკვიდაციის საფრთხის შესახებ განცხადებას ავრცელებენ.
ადვოკატი რობერტ ამსტერდამისა და მისი იურიდიული ფირმის მიერ გავრცელებულ განცხადებაში ნათქვამია, რომ ინფორმაცია ორი უცხოური სადაზვერვო სააგენტოსგან მიიღო. ამსტერდამი საერთაშორისო სამართალდამცავ ორგანოებს მოუწოდებს, უზრუნველყონ ბაჩიაშვილის დაცვა და გამოიძიონ, ვინ დგას ამ საქმის უკან.
“გიორგი ბაჩიაშვილის წარმომადგენელმა საერთაშორისო ადვოკატმა, რობერტ ამსტერდამმა, ორი უცხოური სადაზვერვო სააგენტოდან მიღებული ინფორმაციის საფუძველზე, მისი კლიენტის სიცოცხლისთვის სარწმუნო მუქარის შესახებ შეიტყო.
მათი კლიენტის წინაშე არსებული სახიფათო სიტუაციის გათვალისწინებით, ბატონი ამსტერდამის იურიდიულ გუნდს სხვა გზა არ აქვს, გარდა იმისა, რომ გაავრცელოს ეს განცხადება და მოუწოდოს საერთაშორისო სამართალდამცავ ორგანოებს, უზრუნველყონ ბატონი ბაჩიაშვილის დაცვა და გამოიძიონ ამ სავარაუდო შეთქმულების უკან მდგომი პირები” ნათქვამია განცხადებაში.
იურიდიული კომპანია ბაჩიაშვილის კომენტარსაც ავრცელებს: „ჩვენ გვჯერა, რომ საქართველოს ხელისუფლება ჩაერთვება ძალადობის პრაქტიკულად ნებისმიერ დონეზე, რეჟიმის ყველა პოლიტიკური ოპონენტისა და კრიტიკოსის განადგურების მიზნის მისაღწევად“.
ადვოკატმა ამსტერდამმა ასევე არ გამორიცხა, რომ მკვლელობის შეთქმულება შეიძლება იყოს „გარე ძალების ნამუშევარი, რომლებიც ცდილობენ საქართველოში სიტუაციის კიდევ უფრო დესტაბილიზაციას” – ვკითხულობთ განცხადებაში.
„ამსტერდამი და პარტნიორები“ საერთაშორისო იურიდიული ფირმაა, რომლის ოფისებიც ლონდონსა და ვაშინგტონში მდებარეობს.
შეგახსენებთ, 4 მარტს ცნობილი გახდა, რომ გიორგი ბაჩიაშვილმა საქართველო დატოვა. ამის შემდეგ, ე.წ. ბიტკოინების საქმეზე სასამართლომ მას 11 წლით თავისუფლების აღკვეთა მიუსაჯა. მოსამართლე გიორგი გელაშვილმა ბაჩიაშვილი ბრალად წარდგენილ ორივე ქმედებაში დამნაშავედ ცნო, როგორც დიდი ოდენობით თანხის მითვისებაში, ასევე უკანონო შემოსავლის ლეგალიზაციაში.
თანხის მითვისების ნაწილში, მას 10 წლით თავისუფლების აღკვეთა განუსაზღვრა, ხოლო უკანონო შემოსავლის ლეგალიზაციაში 11 წლით თავისუფლების აღკვეთა. ამ უკანასკნელმა 10-წლიანი სასჯელი შთანთქა და მას საბოლოოდ თავისუფლების აღკვეთა 11 წლით განესაზღვრა.
ბაჩიაშვილს ბრალი კიდევ ორ საქმეზე აქვს წარდგენილი. ე.წ. მტკვარი ჰესისა და საზღვრის უკანო კვეთაზე.