თბილისის საქალაქო სასამართლოში მიმდინარე აქციებისას დაკავებული აქტივისტების – ანდრო ჭიჭინაძის, ონისე ცხადაძის, ჯანო არჩაიას, რუსლან სივაკოვის, ლუკა ჯაბუას, გურამ მირცხულავას, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კინაძისა და სერგეი კუხარჩუკის – პროცესი მიმდინარეობს.
მოსამართლე ირაკლი შვანგირაძემ დარბაზში პატიმრების ოჯახის წევრები არ შეუშვა.
მათ შორის ერთ-ერთია გიორგი ქერაშვილის დედა, ქეთევან ქვრივიშვილი, რომელმაც „ფორმულასთან“ ინტერვიუში განაცხადა, რომ 10 წელია, ემიგრაციაშია, დღეს ღამით ბრუნდება იტალიაში და შვილის ნახვის საშუალება არ მიეცა.
„დიდი უსამართლობაა, რომ ოჯახის წევრები ვერ ვესწრებით სასამართლო პროცესს იმიტომ, რომ ერთ-ერთი საშუალება იმისა, რომ დავინახოთ ჩვენი შვილები, არის სასამართლო პროცესი. შეხვედრებზე როდესაც დავდივართ , მაშინ მინის მიღმა ზიან პატიმრები და ტელეფონით ვესაუბრებით და პროცესზე დასწრება კიდევ ერთი შესაძლებლობაა ხოლმე, უშუალოდ შვილების ხილვა.
ამაღამ მივფრინავ იტალიაში, 10 წელია ემიგრაციაში ვცხოვრობ და დღევანდელ დღეს ველოდებოდი მოუთმენლად და რატომღაც არ მიშვებენ“, – განაცხადა ქეთევან ქვრივიშვილმა.