2026 წლის მსოფლიო ჩემპიონატი ფეხბურთში ახალი, გაფართოებული ფორმატით, გაიმართება. ტურნირში 32-ის ნაცვლად, მონაწილეობას მიიღებს 48 ქვეყნის ნაკრები, რომელთა შორის, 16 ევროპული იქნება.
მსოფლიო ჩემპიონატზე მოხვედრის ორი გზა არსებობს.
ერთი არის ტრადიციული გზა – საკვალიფიკაციო ეტაპის წარმატებით გავლა.
ევროპული ნაკრებები გადანაწილდა 12 ჯგუფში.
ჯგუფის გამარჯვებულები მუნდიალზე პირდაპირ გავლენ, 12 მეორეადგილოსანი კი, „ერთა ლიგის“ 4 საუკეთესო გუნდთან (რომლებიც ივნისში გამოვლინდებიან) ერთად, პლეი-ოფებით გაინაწილებს ჩემპიონატის კიდევ 4 ადგილს.
მსოფლიო ჩემპიონატზე მოხვედრის მეორე გზა „ერთა ლიგაზე“ გადის.
აქ თავს მოიყრის მოცემული მომენტისთვის ტურნირის რეიტინგის საუკეთესო 4 გუნდი, რომლებიც საკვალიფიკაციო ჯგუფებში პირველ-მეორე ადგილებზე ვერ გავლენ.
პლეი-ოფებში გამარჯვებულებს გაარკვევს თითომატჩიანი შეხვედრები – ნახევარფინალი და ფინალი.
რაკი საქართველოს ეროვნულმა ნაკრებმა გასული სეზონის „ერთა ლიგის“ ტურნირი მე-3 ადგილზე დაასრულა, ის „ერთა ლიგის“ გზით მსოფლიო ჩემპიონატზე ვერ მოხვდება.
ამდენად, საქართველოს რჩება ერთადერთი შანსი – ტრადიციული გზის, საკვალიფიკაციო ეტაპის, წარმატებით გავლა.
ამ გზაზე ჩვენი ნაკრებში E ჯგუფში ესპანეთს, თურქეთსა და ბულგარეთს დაუპირისპირდება.
ჯგუფურ ეტაპს 4 სექტემბერს, „დინამო არენაზე“, თურქეთთან მატჩით დავიწყებთ.