სომეხთა მთავარმა მწვრთნელმა, ჯონ ვან’ტ სხიპმა საქართველოსთან 0:3-ით წაგებული შეხვედრის შემდეგ გამართულ პრესკონფერენციაზე გუშინდელი თამაშის შესახებ ისაუბრა.
მან ასევე შეაფასა საქართველოს ნაკრები. სხიპის თქმით, საქართველო გამოცდილი და მაღალი დონის გუნდია.
„შედეგი თამაშის შესაბამისია და ასახავს იმ სიტუაციას, რომელიც ამ ორ გუნდს შორის არსებობს. ძირითადი განსხვავება ისაა, რომ ვიზავი უფრო მოწიფულია. სამივე გაშვებული გოლისას დაცვაში შეცდომები დავუშვით. ეს იმ მდგომარეობას ასახავს, რომელშიც ამჟამად ჩვენი გუნდი იმყოფება. მთავარია, ფეხბურთელებმა მუშაობა გააგრძელონ და ეცადონ საქართველოს ნაკრების დონეს მიაღწიონ.
გვქონდა დადებითი მომენტები, მაგრამ როდესაც ასეთ ძლიერ მეტოქესთან ასეთ შეცდომებს უშვებ, ძნელია სხვა შედეგის იმედი გქონდეს. ჯერ ცვლილებზე საუბარი ნაადრევია, ყველაფრის გაანალიზებაა საჭირო. შესაძლოა, თბილისში შემადგენლობაში ცვლილებები განვახორციელო. ამაზე ამ დღეებში ვიფიქრებთ.
ამ გუნდს ისეთ გამოცდილ და მაღალი დონის მოწინააღმდეგესთან კონკურენციის გასაწევად, როგორიც საქართველოა, აუცილებელი დონის მიღწევა და გაზრდა სჭირდება. გულშემატკივრებმა მოთმინება უნდა იქონიონ და იმედოვნონ, რომ ეს შესაძლებელია. აუცილებელია ბურთის დაკარგვების რაოდენობა შევამციროთ და ისეთი კადრები შევარჩიოთ, რომლებთანაც მომავალში ვიმუშავებთ“, – აღნიშნა სხიპმა.
შეგახსენებთ, საპასუხო შეხვედრა თბილისში, 23 მარტს გაიმართება.
ორმატჩიან დაპირისპირებაში სომხეთთან გამარჯვების შემთხვევაში, საქართველოს ნაკრები B ლიგაში ადგილს შეინარჩუნებს.