პროდიუსერი ნატო დუმბაძე დაავადებათა კონტროლის ცენტრის ხელმძღვანელის, ამირან გამყრელიძის სადილის ფოტოების გავრცელებას “ფეისბუქის” პირად გვერდზე ეხმაურება:
„ისე, „გარდენიას“ ლუქი ახსნეს? ჯარიმაც დაუბრუნონ ახლა! ერის მოღალატედ რომ გამოაცხადეს, იქ მეტი კი არაფერი ხდებოდა, ნუ კრამიტს თუ არ ჩავთვლით, იმ კაცსაც მეგობრები ჰყავდა სტუმრად ღია სივრცეში, სხვა კი არაფერი!
როგორ თქვა, მომეწიეთო ხო? ჰოდა, კი მიეწია, „ტუტ კაკ ტუტ“,” – წერს დუმბაძე სოციალურ ქსელში.
ცნობისთვის, 2021 წლის 25 სექტემბერს დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ თანამშრომლებთან ერთად ველისციხეში ვაქცინაციის ცენტრი მოინახულა და მოსახლეობას შეხვდა, ამის შესახებ ინფორმაციას ფოტოებთან ერთად სტუდია “მონიტორი” ავრცელებს.
გამოცემას წყარომ მიაწოდა ფოტოები, სადაც ჩანს, რომ NCDC-ის თანამშრომლები „მარან ველისციხურში“ სადილობისას რეგულაციებს არღვევენ. მოქმედი რეგულაციების მიხედვით, ღია სივრცეში სკამების საზურგეებს შორის მანძილი უნდა იყოს 1 მეტრი.
დაავადებათა კონტროლისა და საზოგადოებრივი ჯანმრთელობის ეროვნული ცენტრში განაცხადეს, რომ იქ მყოფი ადამიანები აცრილები არიან და ღია სივრცეში მოქმედ რეგულაციებს არ არღვევენ.
