თბილისში ქმარმა ცოლი დაჭრა – ინფორმაციას “ტვ პირველი” ავრცელებს, 40 წლამდე ქალი ერთ-ერთ კლინიკაში დღეს დილით მოათავსეს და ამ წუთებში ექიმები მას ოპერაციას უკეთებენ.
სასწრაფოს ბრიგადამ პაციენტი კლინიკაში ათობით ჭრილობით მიიყვანა. “პირველებს” დაშავებულის დედა უყვება, რომ მომხდარს მათი არასრულწლოვანი შვილი შეესწრო. ძალადობა გამოვლილი ქალის ოჯახის წევრების ცნობით, პოლიციაში თავად მოძალადემ დარეკა.
კაცი, რომელმაც საკუთარ ცოლს სხეულის არეში დაზიანებები მიაყენა, სავარაუდოდ, დაკავებულია. TVPIRVELI.GE ოჯახის ინტერესებიდან გამომდინარე, სახელებისა და გვარების იდენტიფიცირებისგან თავს იკავებს.
“დაკითხვაზე ვარ, კლინიკიდან წამოვედი. სახლში არის მოსული პატრული. ჩემს შვილს იმდენი ჭრილობა აქვს, რომ ადგილი არ აქვს დატოვებული. ამდენი ჭრილობით არავინ შემოუყვანიათო. რომ იძახდა მიშველეთო, ეს არ მიშვებდა. ჩემი შვილი სისხლს ფანტანივით ასხამდა. არ ვიცი ახლა როგორ გელაპარაკებით, ჭკუაზე არ ვარ.
შევესწარი ამ ფაქტს. რომ გავიგე, გავედი, ჩემი შვილიშვილი გამოვარდა, როგორც იქნა მამამისი დაიჭირა, გამოათრია აქეთ, რომ შევსულიყავი და მისთვის მიმეხედა. ძირს ეგდო, იატაკზე. გადმოათრია, თმებით ათრევდა, სავარაუდოდ. დაწოლილი იყო ბავშვი ლოგინში და გადმოათრია ქვემოთ, მუცელზე იწვა. თმებით მოათრია ალბათ კარამდე”. – განაცხადა დაშავებული ქალის დედამ.
ჩემი და შევარდა კივილი როცა გაიგო. არ უშვებდა, კარებს ვერ ვაღებდი, ეჭირაო. შემდეგ ჩემი დის შვილი დახმარებია და შესულა. სულ დასისხლიანებული დამხვდაო. ძალიან ბევრი ჭრილობა აქვს. პოლიციაში ჩემს სიძეს დაურეკავს, ცოლი დავჭერიო”. – განაცხადა დაშავებული ქალის ბიძამ.