ქუთაისის საქალაქო სასამართლოში მაია ცირამუას, ნინო ქათამაძის, გელა მთივლიშვილის, ვლადიმერ აფხაზავას, ხვიჩა ვაშაყმაძის, ირინა ზარანდიას, ქეთევან ფილაურის, ეკა კუხალაშვილისა და გივი ცინცაძის სასამართლო პროცესი მიმდინარეობს.
„დღეს გაკვეთილზე უნდა ვყოფილიყავი და მიწევს სასამართლოში მოსვლა…
ცუდი სიტყვები არ გამოგვიყენებია, ჩვენი სოლიდარობა გამოვთქვით – თურმე სოლიდარობა ისჯება. ძალიან სამწუხაროა“, – თქვა მასწავლებლის ეროვნული ჯილდოს მფლობელმა, ლადო აფხაზავამ, პროცესის დაწყებამდე.
შეგახსენებთ, 7 თებერვალს, ზემოაღნიშნულ პირებს მზია ამაღლობელის უკანონო პატიმრობასთან დაკავშირებით, ქუთაისში, მოსამართლის სახლთან 30-წუთიანი საპროტესტო შეკრების გამო, შინაგან საქმეთა სამინისტრომ ადმინისტრაციული სამართალდარღვევის ოქმი შეუდგინა (ადმინისტრაციულ სამართალდარღვევათა კოდექსის 174¹ მუხლის მე-3 ნაწილი). ეს მუხლი სასჯელის სახით 15 დღემდე ვადით დაპატიმრებას ითვალისწინებდა, თუმცა კოდექსში განხორციელებული ცვლილებებით, რომელიც „ოცნების” პარლამენტმა 6 თებერვალს მიიღო, იგივე ქმედება ისჯება 5 000-ლარიანი ჯარიმით ან 60 დღემდე ვადით პატიმრობით.
მზია ამაღლობელი, 30-ე დღეა, შიმშილობს.
ის 11 იანვარს, ბათუმში დააკავეს. ბათუმის საქალაქო სასამართლომ მას აღკვეთის ღონისძიების სახით პატიმრობა შეუფარდა.
მზია ამაღლობელს ბრალი სისხლის სამართლის კოდექსის 353-ე პრიმა მუხლით აქვს წაყენებული, რაც პოლიციელზე თავდასხმას გულისხმობს. მას 4-დან 7 წლამდე პატიმრობა ემუქრება.