რიყის პარკში მომხდარი ტრაგედიის გამო, თბილისის მერიასთან პარტია “გახარია საქართველოსთვის” ორგანიზებით საპროტესტო აქცია მიმდინარეობს.
როგორც აქციის მონაწილეები აცხადებენ, რიყის პარკთან არსებულ შენობა-ნაგებობაში მომხდარ ტრაგედიაზე, რომლის დროსაც მოზარდი დაიღუპა, პასუხისმგებელი თბილისის მერიაა.
მათივე თქმით, შემთხვევის ადგილზე არ იყო დაცული უსაფრთხოების ნორმები.
ადგილზე შეკრებილები მოუწოდებენ დედაქალაქის მერს, კახა კალაძეს, მომხდარზე აიღოს პასუხისმგებლობა და თანამდებობიდან გადადგეს.
აქციის მონაწილეებმა მერიის წინ საპროტესტო ბანერები მოიტანეს წარწერით: “სიკვდილით სავსე ქალაქი”; “ვაკის პარკი 2022 წელი, წყნეთის სკვერი 2023 წელი, რიყის პარკი 2025 წელი – მკვლელებო”; “კახი მკვლელი ხარ!”.
შეგახსენებთ, დღეს „ტვ პირველმა“ გაავრცელა ინფორმაცია, რომლის მიხედვითაც, რიყის პარკში მერვე კლასის მოსწავლე ღია თხრილში ჩავარდა და გაიგუდა. გავრცელებული ინფორმაციით, ადგილზე, სადაც ტრაგედია დატრიალდა არც გამაფრთხილებელი ნიშნები და არც უსაფრთხოების ზომები არ არსებობდა. მოზარდის გადარჩენას მეგობრები ცდილობდნენ, თუმცა ვერ შეძლეს. შემთხვევა 25 იანვარს მოხდა.