რას პასუხობს გურამ როგავა „იმედის“ მფლობელს?

ტელეკომპანია „იმედის“ მმფლობელმა, ირაკლი რუხაძემ „რადიო თავისუფლებას“ ვრცელი ინტერვიუ მისცა.

მან სხვადასხვა თემაზე, მათ შორის, ჟურნალისტებზე ძალადობის „იმედზე“ გაშუქების თემაზეც ისაუბრა.

რუხაძემ თქვა – „როგავა არ ვანახეთ იმიტომ, რომ რაღაცა თქვა, „იმედმა“ მცემაო თუ ჩიხლაძემ და მაგაზე გადაწყვიტეს, რომ არ მივცეთ ეთერი.“

„იმედის“ მფლობელს ჟურნალისტმა გურამ როგავამ სოციალური ქსელით უპასუხა.

„რუხაძემ რადიო თავისუფლებასთან ინტერვიუში თქვა, რომ ჩემზე თავდასხმა არ გაშუქდა “იმედის” გუნდის გადაწყვეტილებით. ჩემზე თავდასხმა მოხდა 29 ნოემბერს, 1 დეკემბერს ირაკლი ჩიხლაძეს გადაცემა ჰქონდა და მარიამ ოშხნელს დაავალა ჟურნალისტებზე ძალადობის შესახებ რეპორტაჟის მომზადება, ასეც მოხდა, რეპორტაჟი დამონტაჟდა და მზად იყო ეთერში გასაშვებად, მასში ჩემზე თავდასხმის კადრიც და ამბავიც ასახულია (ჟურნალისტის ინტერპრეტაცია სხვა საკითხია), მაგრამ ეთერში არ გავიდა. ეგ როგორ მოხდა? ირაკლი ჩიხლაძემ და “იმედის” გუნდმა თუ გადაწყვიტა ჩემი ამბის დაბლოკვა ჩემ მიერ 29 ნოემბერს “ფორმულას” ეთერში გაკეთებული განცხადების გამო, 1 დეკემბრის გადაცემისთვის რატომ მოამზადეს რეპორტაჟი?
კიდევ ერთხელ გიზიარებთ ამ დაბლოკილი რეპორტაჟიდან ეპიზოდს, რომელიც ეთერში ვერ მოხვდა. “იმედს” 2 თვის განმავლობაში ჩემზე თავდასხმა არ უჩვენებია,“ — წერს როგავა.

შეგახსენებთ, როგავას 29 ნოემბერს, აქციის დაშლის დროს, პროფესიული მოვალეობის შესრულებისას, დაესხნენ თავს. შემთხვევის შედეგად, მან კისრის მალა მოიტეხა, დამტვრეული ჰქონდა სახის ძვლები.